“Касаба уюшмаси мени ишда олиб қолди” – бекободлик аёл
Мен “Бекободцемент” заводида 13 йилдан буён фаррош бўлиб ишлайман. Кунларнинг бирида ишхонамиздаги қоровул аёл билан гап талашиб қолдик, ўртамизда жанжал келиб чиқди. Орадан бироз вақт ўтиб менга маъмуриятдан ишдан бўшашим кераклигини айтишди...
Ҳайрон бўлдим. Бунақа пайтда касаба уюшмаси йиғилиш ўтказмайдими, икки томонни эшитмайдими? Ишхона тартиб-қоидаларини бузган деб топишса, биринчи навбатда огоҳлантириш берилиши ёки жарима қўлланиши керак эмасми, бирданига ишдан бўшатишлари қанчалик тўғри?
Мен бундан тушкунликка тушиб қолдим. Шундан сўнг, маъмуриятнинг бу қарори бўйича бир нечта ташкилотларга мурожаат қилдим. Улар ташкилотнинг бу ҳаракати ноқонунийлигини айтишди, бироқ ҳеч ким ёрдам бермади. Энди нима қиламан, ахир оиламнинг ёлғиз боқувчиси бўлсам, камига иккита вояга етмаган фарзандим бор. Шундоқ ишдан бўшатиб юбораверишадими, деб анчагача ўйландим. Бир куни Хотин-қизларни ҳимоя қиладиган 1211 Ишонч телефони борлигини билиб қолдим ва мурожаат қилдим. Буни қарангки, мурожаатимнинг эртасигаёқ бу масала бўйича касаба уюшма қўмитасининг йиғилиши ўтказилди. Унда касаба уюшма қўмита аъзолари “Бекободцемент” АЖ томонидан мени ишдан бўшатиш сўралган хатга розилик беришмади. Тортишиб қолган ҳамкасбим билан ҳам яраштириб қўйишди.
Ҳозир аввалгидай ишлаб, бола-чақамни ҳалол ойлигим билан боқиб юрибман. Мени тушкун аҳволдан чиқарган, оғиримни енгил қилган касаба уюшмаларига чексиз миннатдорлигимни билдираман. Яхши инсонлар доим бор бўлишсин!
Зарина Урушова,
Бекобод шаҳри
Долзарб мавзулар
Mақолага баҳо беринг
0/50
0
0
0
0