Shundan keyin hokim maktab o'qituvchilarini avtobus orqali tuman hokimligi binosiga chaqirishni buyurgan. Hokimlikda o'qituvchilar ishtirokida yig'ilish o'tkazilib, ular bir muddat tik oyoqda turgani aytilmoqda.

Tuman hokimi holatga izoh berib, maktabda ta'lim sifati kutilgan darajada emasligini aytdi. Uning so'zlariga ko'ra, bitiruvchilarning oliy ta'lim muassasalariga kirish ko'rsatkichlari past. Shuning uchun o'qituvchilar bilan qisqa uchrashuv o'tkazib, bu masalani muhokama qilganini ta'kidladi.

Maktabgacha va maktab ta'limi vazirligi ushbu holatni o'rganayotganini ma'lum qildi. vazirlik ma'lumotiga ko'ra, 2025 yilda Karmana tumanidagi 9-maktab bitiruvchilarining 61 foizi oliy ta'lim muassasalariga o'qishga kirgan. Maktab bitiruvchilarining o'rtacha balli 98,7 ni tashkil etgan va bu ko'rsatkich o'tgan yilga nisbatan oshganini bildirdi.

Eslatib o'tish joiz, “Pedagogning maqomi to'g'risida”gi qonunga muvofiq pedagoglarning sha'ni, qadr-qimmati va ishchanlik obro'si davlat himoyasida bo'ladi. Qonunga ko'ra, pedagogning kasbiy faoliyatiga aralashish yoki uni o'z vazifasiga aloqador bo'lmagan ishlarga jalb qilish taqiqlanadi.

vazirlik pedagoglarning qonuniy huquq va manfaatlarini himoya qilish hamda ularning kasbiy mavqeini saqlash bo'yicha tegishli choralar ko'rilishini bildirdi.