Юқори ташкилотдан ходимлар сонини қисқартириш тўғрисида буйруқ келганлиги сабабли, Тошкент вилояти Оҳангарон туманидаги “Халқ банки”да ишловчи А.Убайдуллаев билан тузилган меҳнат шартномаси бекор қилинди. Оқибатда ушбу тизимда нақ 25 йил ишлаган ходим бир зумда ишсиз қолди…

– Барча ходимларга штатлар қисқариши бўйича огоҳлантириш хатлари берилди, – дейди А.Убайдуллаев. – Улар билан қайта меҳнат шартномаси тузилди, аммо мен билан қайта тузилмади. Сабабини сўраганимда, ўз хоҳишим билан ишдан бўшашим кераклигини ходимлар бўлими бошлиғи оғзаки айтди, ёзма асос беришмади. Бундан қатъий бош тортдим. Лекин икки ой ўтиб, мен билан тузилган меҳнат шартномасини бекор қилишибди. Қани айтингчи, менинг 25 йиллик иш стажим, охирги 7 йилда фақатгина шу вазифада ишлаганим, қолаверса, ёшим 55 га чиқаётганлиги нима учун инобатга олинмади? Ваҳоланки, штат қисқартирилганида биринчи навбатда кўп йиллик меҳнат стажига эга, нафақа ёшига етган ходимларга имкон берилиши керак эди. Кўп сарсон бўлдим. Охири касаба уюшмаларига мурожаат қилдим…

Маълум бўлишича, меҳнат ҳуқуқлари бузилган А.Убайдуллаев сўнгги илинж сифатида Ўзбекистон касаба уюшмалари Федерацияси Тошкент вилояти Кенгашига мурожаат қилган. Аниқланган фактларга кўра, ходим билан тузилган меҳнат шартномасини бекор қилиш тўғрисидаги тақдимнома юзасидан муҳокама йиғилиши ўтказилиши керак бўлган. Бироқ, касаба уюшмаси бошчилигида ўтказилиши лозим бўлган ушбу йиғилиш нима сабабдандир ўтказилмаган. Даъвогар иш билан таъминланиш бўйича қонунда белгиланган имтиёзлардан ҳам фойдаланмаган. Оқибатда у бир неча ой ишсиз қолиб кетган.

Касаба уюшмаси инспектори томонидан иш берувчига аниқланган камчиликларни бартараф этиш бўйича бир неча марта оғзаки кўрсатма берилди. Лекин иш берувчи камчиликларни бартараф қилмади. Сўнг, иш судга оширилди. Фуқаролик ишлари бўйича Тошкент шаҳар Учтепа туманлараро суди АТ “Халқ банки” Тошкент вилояти филиалининг даъвогар билан тузилган меҳнат шартномасини бекор қилиш ҳақидаги буйруқни бекор қилиш, ишга тиклаш, мажбурий бекор юрган кунлари учун компенсация ундириш ҳақидаги даъво аризасини қаноатлантирди. А.Убайдуллаевнинг фойдасига жами 50 млн сўмдан зиёд маблағ ҳам ундириб берилди.

Машраб МИРЗАЕВ,

Ўзбекистон касаба уюшмалари Федерацияси Тошкент вилояти кенгаши меҳнат-ҳуқуқ инспектори