Иш ёки фарзанд: қонун қай томонда?
Савол: Аёлим туғруқ вақтида вафот этди. Бола менинг қарамоғимда. Аммо бошлиғим "Ўрнингизга доимий бир ходим олмоқчиман, чунки у ўриндошликка кўнмаяпти. Келганингизда сизга бошқа иш топиб беравераман, ташлаб қўймайман", деяпти. Шу тўғрими?
Саволга Ўзбекистон соғлиқни сақлаш ходимлари касаба уюшмасининг Тошкент вилояти бўйича меҳнат-ҳуқуқ инспектори Муҳаммаджон Рўзметов жавоб берди.
— Уч ёшгача боласи бор аёл ёхуд уч ёшгача бўлган болани ёлғиз тарбиялаётган ота (васий) билан меҳнат шартномасини иш берувчининг ташаббусига кўра бекор қилиш фақат қуйидаги ҳолатларда амалга оширилиши мумкин:
– ташкилот (унинг алоҳида бўлинмаси) тегишли қарор билан тугатилганда ёхуд якка тартибдаги тадбиркор томонидан фаолият тугатилганда;
– ходим ўз меҳнат мажбуриятларини мунтазам равишда бузганда;
– ходим ўз меҳнат мажбуриятларини бир марта қўпол равишда бузганда.
Ушбу ҳолатда ходимлар билан меҳнат шартномаси бекор қилинганда уларнинг бола парваришлаш нафақасини олиш ҳуқуқи сақланиб қолади.
Муҳим эслатма: Боласи уч ёшга тўлгунига қадар бола парваришлаш таътилида бўлган ходим билан меҳнат шартномасини иш берувчининг ташаббусига кўра Меҳнат кодексининг 161-моддаси иккинчи қисмининг 3-бандига мувофиқ бекор қилишга ходим таътилдан чиққан кундан эътиборан бир йил ичида йўл қўйилмайди.
