Ҳамширалар зарарли омиллар билан ишлаганлиги учун ойлик маошига 15 фоизли устама хақлар тўланмаётганлигига эътироз билдиришган. Ушбу мурожаат атрофлича ўрганиб чиқилди. Аслида, Ўзбекистон Республикаси Вазирлар Махкамасининг 2005 йил 21 декабрдаги 276-сонли “Тиббиёт ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида”ги қарорининг тегишли бандларида визуал назорат қилган ҳолда оператив аралашувларда рентген аппаратларидан фойдаланиладиган барча ихтисослардаги хирургия бўлимлари кичик тиббиёт ходимларига 15 фоиз миқдорида қўшимча тўлов бериш ҳуқуқи белгилаб қўйилган. Лекин шундай бўлса-да, иш берувчи томонидан юқоридаги ходимларга зарарли омил учун қўшимча тўлов 2024 йил март ойидан буён тўланмасдан келинган.

Юқоридаги тўловларни амалга ошириш юзасидан Ўзбекистон Соғлиқни сақлаш ходимлари касаба уюшмасининг Тошкент вилояти Кенгаши меҳнат техник инспектори томонидан иш берувчига кўрсатма хати киритилди. Бироқ, кўрсатма хат ижроси таъминланмади. Шундан сўнг, фуқаролик ишлари бўйича Чирчиқ туманлараро судига даъво аризаси киритилди.

Судда ходимларга зарарли омил билан ишлаганлиги учун тўланмаган жами 20 млн. сўмдан ортиқ маблағни ундириш ва ходимларга ойма-ой тўлаб бориш бўйича хал қилув қарори чиқарилди. Мурожаатчи 10 нафар ходимларнинг барчасига устамалар ундириб берилди.

Жўрабек Исломбеков,
Ўзбекистон Соғлиқни сақлаш ходимлари касаба уюшмасининг Тошкент вилояти кенгаши меҳнат техник инспектори