Шу боис сўнгги йилларда кўплаб соҳалар сингари экология йўналиши ривожига ҳам катта эътибор қаратилди: экология идораларида ишловчи ходимлар хизмат машиналари, планшетлар, махсус кийим-бош­, бошқа зарур жиҳоз ҳамда воситалар билан таъминланган. Лекин, афсуски, ҳозир тизимда ходимлар сони қисқартирилгани туфайли мутахассислар етишмайди. Масалан, 2019 йилда Нурафшон шаҳрида ходимлар сони 10 нафар бўлган, Тошкент вилояти бўйича эса, 400 нафар атрофида ходим ишларди. Ҳозир 100 нафарга яқин ишчи бор.

Биргина Нурафшон шаҳри мисолида олсак, бу ердаги инспекцияда айни вақтда атиги икки нафар – раҳбар ва ходим ишлайди. Шаҳарда эса 22 та маҳалла фуқаролар йиғини бор. улардаги тарғибот, назорат, идорадаги ҳужжат ишларини бажариш эса кишидан катта меҳнат талаб қилади, икки киши ҳаммасига улгурмайди.

Бинобарин, маҳалла фуқаролар йиғинларида экоинспекторлар штатлари очилса, мақсадга мувофиқ бўларди. Негаки, чиқиндиларни ташлаш, сувни ифлослантириш, дарахтларни ноқонуний кесиш, рухсатсиз ов қилиш аксарият ҳолларда маҳаллаларда амалга оширилади. Аҳоли ҳам маҳалла идорасида ишловчиларни яхши танийди. Еттилик мунтазам улар билан юзма-юз алоқада. Сирасини айтганда, аҳолига маҳалла идорасидагиларнинг таъсири кўпроқ. Агар ҳар бир ҳудудда экоинспекторлар ҳам бўлса, бу тарғибот учун ҳам яхши бўлиб, аҳоли билан ишлашда самарали натижалар берган бўларди. Айниқса, «Атроф-муҳитни асраш ва «яшил» иқтисодиёт йили»да бу чорани қўллаш ҳар қачонгидан муҳим, деб ҳисоблайман.

Мақсудали Ҳасанов,
Тошкент вилояти Нурафшон шаҳар
Экология инспекцияси бошлиғи