1 – 3 ноябрь кунлари Наманган шаҳридаги “Афсоналар водийси” тематик паркида III-халқаро "Асал фестивали" ўтказилмоқда.

Тадбир дастуридан республикамизда қишлоқ хўжалиги туризмини ривожлантириш масалаларига бағишланган “Илмий-амалий конференция” ва асал кўргазмалари, спорт мусобақалари, меҳмонлар учун концерт, шунингдек, асаларичилик соҳасидаги етакчи маҳаллий ва хорижлик мутахассислардан маҳорат дарслари ўрин олган.

Бу йилги фестивалда ҳам 250 дан ортиқ маҳаллий ва хорижлик асаларичилар ўз табиий маҳсулотларини намойиш этиш истагини билдирганлар.

III Халқаро асал фестивалининг асосий тадбирлари ўтаётган “Афсоналар водийси” тематик паркида 150 дан ортиқ павильонлар ташкил этилган.

Уларда Қирғизистон, Қозоғистон республикалари ва Россия Федерациясидан 100 нафарга яқин асаларичилик соҳасидаги хорижий тадбиркорлар ҳам иштирок этаяпти. Фестивалга 2,5 мингга якин хорижий ва 10 мингга яқин маҳаллий сайёҳлар келиши кутилмокда.

Маълумот ўрнида: ҳозир йилига мамлакат ҳудудидан экспортга чиқадиган асалари пакетларининг 58,5 фоизи Наманган вилояти улушига тўғри келади.

Жумладан, жорий йилда республикамиздан 171 минг дона асалари пакети экспорт қилинган бўлса, шунинг 100 минг донаси вилоят ҳиссасига тўғри келади.

Хусусан, шу йилнинг ўтган даврида Қозоғистонга 17 минг 280 та асалари оиласи экспорт қилинди.

Айни пайтда 4590 та асаларичи томонидан 348.000 та асалари оилалари парвариш қилиб келинмоқда.

Биргина жорий йилнинг ўтган даврида 4 минг 200 тонна маҳсулот етиштирилди.