Олмаотада бир кишининг ўртача ойлик харажати (ижарасиз) 750–800 АҚШ доллари атрофида. Шу билан бирга, марказда жойлашган бир хонали квартирани ижарага олиш нархи 500–600 долларни ташкил этади.

Таққослаш учун:
Тошкентда шу турдаги уй учун ўртача ижара ҳақи 350–400 доллар,
Бишкекда 300 доллар,
Душанбеда эса 250 доллар атрофида.

Маҳсулот нархларида ҳам фарқ сезилади. Масалан, 1 кг. мол гўшти Олмаотада ўртача 10–12 доллар, Тошкентда эса 8-9 доллар атрофида. Транспорт, коммунал хизматлар ва умумий истеъмол саватчаси бўйича ҳам Қозоғистон шаҳри минтақада етакчилик қилмоқда.

Иқтисодчилар фикрича, Олмаотадаги нархларнинг тез ўсишига бир нечта омиллар сабаб бўлган:

1. Уй-жой бозоридаги босим. Сўнгги уч йил ичида шаҳар аҳолиси 2 миллиондан ошди. Талаб ортгани сари янги турар-жойлар қурилиши ҳам тезлашди, аммо уларнинг аксарияти юқори даромадли қатламга мўлжалланган.
2. Хизматлар сектори кенгайган. Банк, IT, таълим ва тиббиёт соҳаларидаги хусусий хизматлар кўпайса-да, уларнинг нархи ҳам ошиб бормоқда.
3. Инфляция ва валюта курси. Қозоғистон миллий валютаси — тенге 2024 йил давомида 10 фоизга қадрсизланди. Бу эса импорт товарлари ва ижара нархларига тўғридан-тўғри таъсир кўрсатди.

Бу эса, айниқса, ўрта синф ва бюджет соҳаси вакиллари учун янги синовларни келтириб чиқармоқда.

Феруза Раҳимова,
Ishonch.uz