Соғлом турмуш тарзини тарғиб қилиш, муаллимлар ўртасида жисмоний фаолликни ошириш ва жамоавий руҳни мустаҳкамлаш мақсадида ташкил этилган ушбу тадбирда сўзга чиққанлар касаба уюшмалари ҳаракати фаолиятига алоҳида урғу бердилар.

– Жисмонан бақувват, соғлом фикрли, билимдон, юксак маънавиятли авлодни вояга етказишда мактабнинг, хусусан, педагог-ўқитувчиларнинг ўрни беқиёс, – деди йиғилишда сўз олган Тадбиркорлик, бизнес ва хизмат кўрсатиш соҳалари ходимлари касаба уюшмаси Республика кенгаши раиси Улуғбек Муҳамедов.

Беллашувда Шайхонтоҳур, Сергели ва Мирзо Улуғбек туманларидаги ихтисослаштирилган мактабларнинг жами 90 нафар ходими спортнинг олти тури бўйича ўзаро куч синашди.

– Касаба уюшмалари фақат ҳуқуқий ҳимоячигина эмас, балки инсон саломатлиги, меҳнат муҳити ва жамоавий бирдамликнинг таянчи ҳам бўлиши керак, – дейди Тошкент шаҳар касаба уюшмалари бирлашган қўмитаси раиси Дилфуза Исмоилова. – Назаримда, бугунги тадбир бунинг амалий исботи бўлди.

– Шахмат фақат ақл ўйинигина эмас, балки сабр, мантиқ ва диққатни чархлайдиган восита ҳамдир, – деди шахмат бўйича ғолибликни қўлга киритган иштирокчи Авазбек Равшанов. – Мусобақа дўстона руҳда, кўтаринки кайфиятда ўтди. Бу каби беллашувлар ўзаро тажриба алмашишга хизмат қилиши шубҳасиз.

Ғолиб ва совриндорлар ташкилотчиларнинг эсдалик совғалари ва фахрий ёрлиқлари билан тақдирландилар.