— Терма жамоада ҳозирча барчаси яхши, футболчилар соғлом. Ўйинчиларимиз эртанги баҳсга юз фоиз тайёр. Футболчилар эътиборини бир жойга жамлашган ва бу мени хурсанд қилмоқда. —деди Катанец.— КХДР ва бизнинг ўртамизда фарқ шундаки, бу терма жамоа ўйинолди йиғин ташкил эта олди ва ўртоқлик ўйинларини ўтказди.
Биз уч йилдан бери биргамиз. Ўйинчилар душанба куни терма жамоа билан шуғулланишни бошлади. Иккита машғулот ўтказдик, бугун расмий машғулотда иштирок этамиз ва эртага ўйин, лекин футболчилар нима қилишни жуда яхши билишади. Шунингдек, жуда кўп хоҳиш ҳам яхши оқибатларга олиб келмайди. Бу шунчаки ортиқча босим холос. Мотивациянинг кўпайиб кетиши ёки умуман бўлмаслиги ҳам ёмон. Ўз ишимизни бажаришда давом этишимиз керак, КХДР ҳам бекорга сўнгги босқичга қадар етиб келмаган.

Рақибни таҳлил қилиш осон вазифа эмас экан. Сабаби, улар жуда кўп ротацияга қўл уришади. Масалан, Японияга қарши учрашувда бошқа таркиб, Сурияга қарши эса бошқа таркиб майдонга туширилган, аниқроғи тўртта ўзгариш бўлган. Ўйинчилар мураббий нима истаётганини жуда яхши билар ва унинг кўрсатмаларини яхши бажарар экан. Ҳимояда юқори интизом бор. Рақибимиз қарши ҳужумларга таянган ҳолда ўйин олиб боради. Биз кучлироқ жамоамиз ва ўз уйимизда ўйнамоқдамиз. Эртага албатта ғалаба қозонишни мақсад қилганмиз.

Савол Элдор Шомуродовга:

- Бундан ввал икки маротаба Жаҳон чемпионати саралашида иштирок этгансиз. Сиз учун аввалги саралашлардан бу сафаргиси нимаси билан фарқ қилади?

- Аввалги саралашларда ёш футболчи бўлганман. Терма жамоада тажрибали, етакчи футболчилар кўп эди. Бу сафаргиси бироз бошқачароқ. Сабаби бу сафар терма жамоа сардориман ва ўша тажрибали футболчи менман. Энди кўпроқ юк менинг елкамга тушади. Тажрибали футболчилардан ўрганган нарсаларимизни энди қўллаймиз. Аввалги Жаҳон чемпионати саралашларида нимадир етишмагани сабаб, мундиалга чиқа олмаганмиз. Айни дамда, бир оила бўлиб вазифани бажаришимиз керак. Эсимни таниганимдан бери барча ҳамюртларимизнинг орзуси - Ўзбекистоннинг Жаҳон чемпионатига чиқиши. Бу барчамизнинг орзумиз ва ушбу орзуни амалга ошириш учун боримизни берамиз...