600 ming dollarlik “er savdosi”: firibgarlik ustida qo'lga tushgan shaxs qamoqqa olindi
Sirdaryo viloyati Sirdaryo tumanida yashovchi, 1973 yilda tug'ilgan xususiy tadbirkor Buxoro viloyati Peshku tumani hududida joylashgan, oltin va boshqa qimmatbaho metallarga boy bo'lgan davlat zaxirasidagi 290 gektar yer maydonini tanish mansabdorlar orqali auktsion savdosida olib berishni va'da qilgan.
U ushbu “xizmat” evaziga Shofirkon tumanida yashovchi, 1983 yilda tug'ilgan fuqarodan 600 ming AQSh dollari talab qilgan.
Davlat xavfsizlik xizmati Buxoro viloyati boshqarmasi hamda Iqtisodiy jinoyatlarga qarshi kurashish departamenti xodimlari hamkorligida o'tkazilgan tezkor tadbir davomida mazkur shaxs muqaddam bir necha bor firibgarlik jinoyati uchun sudlangani aniqlandi. U fuqarodan oldindan 230 ming AQSh dollari va 840 million so'm olgan vaqtida ashyoviy dalillar bilan ushlandi.
Mazkur holat yuzasidan unga nisbatan Jinoyat kodeksining 25, 168-moddasi 4-qismi “a” bandi hamda 28, 211-moddasi 3-qismi “a” bandi bilan jinoyat ishi qo'zg'atilib, ehtiyot chorasi sifatida qamoqqa olish tarzi qo'llanildi.
Ayni paytda tergov harakatlari davom etmoqda.
Maqolaga baho bering
0/50
0
0
0
0