Ma'lum qilinishicha, shu yil 4 fevral' kuni viloyatda faoliyat yurituvchi yakka tartibdagi tadbirkor tuman ichki ishlar bo'limiga murojaat qilib, unga suiqasd tayyorlanayotgani haqida xabar bergan. Uning bildirishicha, besh nafar shaxsdan iborat uyushgan jinoiy guruh 1500 AQSh dollari evaziga uni qasddan o'ldirish uchun yollanma ijrochi bilan kelishuvga erishgan.

Murojaat asosida Andijon viloyati Ichki ishlar boshqarmasi, Davlat xavfsizlik xizmati hamda viloyat prokuraturasi xodimlari hamkorligida Paxtaobod tumanida maxsus tezkor tadbir o'tkazilgan.

Tadbir davomida 2000 yilda tug'ilgan, muqaddam sudlangan shaxs tadbirkorni o'ldirish evaziga kelishilgan pulning bir qismi — 300 ming so'mni olayotgan vaqtida ashyoviy dalillar bilan qo'lga olingan.

Tezkor harakatlar davomida jinoiy guruhning boshqa a'zolari ham aniqlanib, ushlangan. Tergov ma'lumotlariga ko'ra, “Ronaldo” laqabi bilan tanilgan, 1984 yilda tug'ilgan shaxs guruhga boshchilik qilgan. Gumonlanuvchilar orasida avval sudlanganlar, shuningdek, tibbiyot muassasasi rahbari va 2003 yilda tug'ilgan talaba ham borligi ma'lum qilindi.

Holat yuzasidan O'zbekiston Respublikasi Jinoyat kodeksining 25, 97-moddalari (qasddan odam o'ldirishga suiqasd) bilan jinoyat ishi qo'zg'atilgan. Tergov harakatlari davom etmoqda.