Ilm-fan tarixi insoniyat taraqqiyotiga beqiyos ta'sir ko'rsatgan olimlar nomlari bilan boyitilgan. Ularning matematika, astronomiya, geografiya va tibbiyot sohalaridagi kashfiyotlari hozirgi zamon texnologiyalari va ilmiy yutuqlarining asosiga aylangan. CNN o'z maqolalarida ana shu buyuk mutafakkirlarning boy merosi va ularning ahamiyatini alohida ta'kidlagan. Muhammad Xorazmiy, Ahmad Farg'oniy, Abu Rayhon Beruniy va Abu Ali Ibn Sino kabi afsonaviy olimlar asarlari avlodlarga ilhom manbai bo'lib kelmoqda.

Muhammad Xorazmiy, keng ma'noda algebraning otasi sifatida tanilgan, zamonaviy matematikaning asoslarini yaratgan. CNN maqolalarida shunday deyiladi:

“Xorazmiy – o'zbek olimlari orasida ajoyib iqtidor egasi bo'lib, zamonaviy matematikaning poydevorini qurdi”.

Uning mashhur “Al-Kitob al-Muxtasar fi Hisab al-Jabr va al-Mukabala” asari har kuni foydalanilayotgan texnologiyalarni rivojlantirishga zamin yaratgan.

Ahmad Farg'oniy esa astronomiya, matematika va geografiya sohalarida ulkan yutuqlarga erishib, ilm-fan tarixi va islom tsivilizatsiyasida chuqur iz qoldirgan.

“O'rta asrlardagi o'zbek olimi Ahmad ibn Muhammad al-Farg'oniy, Yevropa olamida Al'fraganus nomi bilan tanilgan, astronomiya va matematika rivojiga ulkan hissa qo'shgan”, deyiladi CNN maqolasida.

Abu Rayhon Beruniy ham juda muhim tarixiy shaxs hisoblanadi. Uning Yerning aylanishi va uning diametrlarini o'lchashga oid kashfiyotlari ilm uchun asos bo'lib qolgan.

“Abu Rayhon Beruniy – buyuk o'zbek olimlaridan biri bo'lib, uning kashfiyotlari antiqa meros va zamonaviy ilm o'rtasida ko'prik vazifasini bajargan”, deya fikr bildirgan nashriyot o'z maqolasida.

Abu Ali Ibn Sinoning ham insoniyat taraqqiyotida hissasi juda katta. G'arbda Avitsenna nomi bilan mashhur bo'lgan bu olimning “Tib qonunlari” asari asrlar davomida tibbiyotning asosiy qo'llanmasi sifatida xizmat qilgan. CNN alloma haqida quyidagicha izoh bergan:

“Bu o'zbek olimi insoniyatga abadiy asar – “Tib qonunlari”ni tuhfa etdi”.

CNN maqolasida, O'zbekiston Prezidenti Shavkat Mirziyoev tashabbusi bilan amalga oshirilayotgan ishlar va buyuk o'zbek allomalarining ulkan merosi shu bilan birga, Islom tsivilizatsiyasi markazi faoliyatiga alohida e'tibor qaratilgan.

Ahmad Farg'oniy, Muhammad Xorazmiy, Abu Rayhon Beruniy va Abu Ali Ibn Sinoning merosi CNN maqolalarida ta'kidlanishi O'zbekistonning jahon ilm-fan va madaniyati rivojidagi ahamiyatli o'rnini yana bir bor namoyon etadi.