Farg'ona shahrida yashovchi 40 yoshli shaxs boshchiligidagi 34 nafardan iborat uyushgan jinoiy guruh Farg'ona va Toshkent shaharlarida ijaraga olingan binolarda “koll-markaz” ko'rinishida faoliyat yuritib kelgan.

Guruh a'zolari axborot texnologiyalari orqali Rossiya Federatsiyasida dori vositalari va biologik faol qo'shimchalar savdosi bilan shug'ullanuvchi tashkilotlar mijozlariga oid 70 mingdan ziyod ma'lumotlarni qo'lga kiritgan. Maxsus tayyorgarlikdan o'tgan operatorlar SIP telefoniya va Zoiper dasturlari orqali asosan keksa yoshdagi fuqarolarga qo'ng'iroq qilib, o'zlarini huquqni muhofaza qiluvchi organ yoki bank xodimi sifatida tanishtirgan.

Ular mijozlarga go'yoki sifatsiz dori vositalari sotilgani uchun 500 mingdan 580 ming rublgacha tovon puli to'lab berilishi aytilgan. Biroq buning uchun avval 5 mingdan 20 ming rublgacha “soliq” to'lash talab etilgan. Shu tariqa jabrlanuvchilar taqdim etilgan bank kartalariga jami 9 mln. 599 ming 561 rubl' o'tkazib berishgan.

Tergov davomida guruhning yana 3 a'zosi tegishli litsenziyasiz kriptovalyuta aylanmasi bilan shug'ullangani ham fosh etildi. Ular amaldagi qonunchilik talablarini buzgan holda qariyb 470 ming AQSh dollariga yaqin kripto-aktiv aylanmasini amalga oshirishgan.
Jinoyat ishlari bo'yicha Yozyovon tuman sudi hukmiga ko'ra, guruh a'zolari Jinoyat kodeksining 168, 243, 278-7 va 278-8-moddalari bilan aybdor deb topildi.

21 nafar shaxsga 3 yil 6 oydan 9 yil 6 oygacha ozodlikdan mahrum etish jazosi tayinlandi. Qolgan 13 nafariga esa 4 yil 3 oydan 4 yil 6 oygacha ozodlikni cheklash jazosi hamda jarimalar qo'llanildi.