Mutaxassislar ta'kidlashicha, bu o'sishga SpaceXning ichki aktsiyalar savdosi (tender offer) asosiy turtki bo'lgan. Unga ko'ra, kompaniyaning bozor bahosi 800 milliard dollarga yetgan. Ayni paytda Ilon Mask SpaceXning taxminan 42 foiz ulushiga egalik qiladi, bu esa uning eng qimmat aktivi hisoblanadi. Forbes baholashiga ko'ra, mazkur ulushning o'zi 336 milliard dollar atrofida.

Ilon Maskning boyligi asosan quyidagi aktivlar hisobiga shakllangan:

• SpaceX — 42% ulush, taxminan 336 mlrd dollar
• Tesla — 12% ulush, qariyb 197 mlrd dollar
• xAI Holdings — sun'iy intellekt yo'nalishidagi kompaniya, taxminan 60 mlrd dollar

Shu tariqa, SpaceX Mask boyligining eng katta va strategik qismi bo'lib qolmoqda.

Forbes ma'lumotlariga ko'ra Ilon Mask — 600 milliard dollarlik boylikka yetgan tarixdagi ilk inson bo'lib qoladi. Shu bilan birga, u 500 milliard dollar chegarasini oshgan yagona shaxs sifatida ham rekord o'rnatdi. Hozirgi kunda dunyodagi ikkinchi o'rinda turgan milliarder — Google asoschilaridan biri Larri Peyjdan 425 milliard dollarga boyroq.

Reuters va Forbes tahlillariga ko'ra, SpaceX 2026 yilda IPO (ommaviy aktsiyalar joylashtirish) o'tkazishni rejalashtirmoqda. Agar IPO muvaffaqiyatli amalga oshsa, kompaniya bahosi 1,5 trillion dollargacha yetishi mumkin. Bu esa Ilon Maskning boyligini yanada oshirib, uni insoniyat tarixidagi ilk trillionerga aylantirish ehtimolini kuchaytiradi. Shuningdek, Tesla'ning uzoq muddatli strategiyasi — sun'iy intellekt, robotaksi, avtonom boshqaruv va “Mars shot” kabi global loyihalar ham investorlar ishonchini oshirib, Mask aktivlarining kelgusida yana qimmatlashishiga zamin yaratayotgani qayd etilmoqda.

Tahlilchilar fikricha, Ilon Mask nafaqat dunyodagi eng boy inson, balki texnologiya, kosmos va sun'iy intellekt sohalaridagi global transformatsiyaning asosiy qahramoniga aylanib ulgurdi. Agar SpaceX IPO va Teslaning innovatsion rejalari kutilgan natijani bersa, insoniyat tarixida yangi moliyaviy bosqich — trillionerlar davri boshlanishi mumkin.