Мустақиллигимизнинг 34 йиллиги ҳамда Ўзбекистонда касаба уюшмалари ҳаракатининг 120 йиллиги муносабати билан ЎКУФ вилоят кенгаши ҳам бу ерда ўз павильонини ташкил этди. Шарқона ва миллий руҳ уфуриб турган павильонда касаба фахрийлари, нуронийлар, меҳмонлар тўхтаб, бир пиёла чой устида мустақиллик берган неъматларга шукроналар келтиришмоқда.

Эслатиб ўтамиз, вилоятнинг агротуризм салоҳияти ва полизчилик тажрибасини кенг тарғиб қилиш мақсадида қишлоқ хўжалик кластерлари, етакчи фермер хўжаликлари ўз павильонларини ташкил этдилар.

Уларда 20 дан зиёд қовун навлари кўргазма-савдоси йўлга қўйилди. Бу фестивалга ўтган йили 200 мингдан ортиқ маҳаллий ва хорижий сайёҳлар ташриф буюрган бўлса, бу йил уларнинг сафи янада ортди.

Тилими тилни ёрадиган Мирзачўл қовунлари яна илгариги шуҳратини тикламоқда. Кўргазмага олмадек митти ошқовоқдан тортиб, 61 килолик йирик ошқовоққача турли навлардаги полиз, сабзавот ва меваларнинг юксак дид ва маҳорат билан безак бериб қўйилгани, тасвирий ва амалий санъат, ҳунармандчилик, миллий либослар кўргазмалари сайёҳларнинг эътиборини тортаётир.

Фольклор ва бадиий жамоаларнинг чиқишлари, саҳна кўринишлари, турли маданий-маърифий тадбирлар кўпроқ томошабинларни жалб этмоқда. Гулистонда байрам кўтаринки руҳда давом этмоқда.