Жомбой тумани Найман қишлоғида яшовчи Гулмира Сафарова ҳам касаба уюшмаларига илинж билан мурожаат қилди. Тўғри, у пул ҳам, бошқа ашёлар ҳам сўрамади. Турмуши бузилиб, 2 нафар фарзандини ёлғиз ўзи тарбиялаётган ногирон аёл оёққа турмоқчи. Қўрасида қўй, оғилхонасида мол бўлса, қаддини тиклаб олишига ишонади. Аммо уларни сотиб олишга қўли калталик қилаётган экан. Кредит ажратилишида ёрдам берилишини истайди.

Аслида бу масаланинг ҳар бир ҳудудда масъуллари бор. Камбағал оилалар билан ишловчи ташкилотларга давлат томонидан бир олам ваколатлар ҳам бериб қўйилган. Аммо касаба уюшмалари кўмак сўровчининг раъйини қайтармади. Мурожаат ўз вақтида мутасаддилар эътиборига ҳавола этилди. Жорий йилнинг 3 март куни масаланинг ечими тўғрисида туман ҳокими Х.Назаров имзолаган хабарни ҳам олди. Унда Гулмира Сафаровага миллий банкнинг туман филиали томонидан ўн миллион сўм миқдорида чорва кредити ажратилиб, муаммо ҳал этилгани «мамнуният» билан маълум қилинганди. Бир муҳтожнинг ташвиши ариса ким ҳам енгил тортмайди, дейсиз. Ахир ўз аравамни ўзим тортаман, дея интилаётган одамни қўллашдан ҳам ортиқ савобли иш борми? Шундай бўлса­да, Гулмира Сафаровага қўнғироқ қилиб, ҳол сўрадик...

– «Ишонч телефони»га чиққанимдан сўнг мени маҳалладаги ҳоким ёрдамчиси Шаҳбоз Ўктамов идорага чақирди, – деди у. – Менга чорва кредити олишим учун банкка «онлайн» ариза беришим лозимлигини тушунтириб, мурожаатим ҳал бўлди, эътирозим йўқ, деб ёздириб олди. Мен унинг «Бу масала назоратимизда бўлади», деган гапларига лаққа тушибман... Дарвоқе, аёл банкка берган чорва кредити сўровига жавобни кўп кутмади. Орадан икки­уч кун ўтмасдан банкдан «Онлайн аризангиз рад этилди» деган «пишакнинг қулоғидек» хат келди. Бунга сабаб – аёлнинг қарздорлиги экан. – Ўғлим дарс қолдиргани туфайли мактаб томонидан 400 минг сўм жаримага тортилганимдан, бу ҳақдаги қарор мажбурий ижро бюроси томонидан ижрога қаратилганидан мутлақо хабарим йўқ эди, – дейди Гулмира.

– Ногиронлик нафақам чиқса, жаримани тўлайман. Аммо банкирларнинг «Энди кредит сўраб келманг, бу масалада эшикларимиз сизга ёпиқ», деган гаплари суяк­суягимдан ўтиб кетди... «Камбағални урма, сўкма, кўйлагини йирт!» қабилидаги бу ишдан ҳайратланади киши. «Қўнғирот» маҳалласидаги ҳоким ёрдамчиси тўқиган ёлғонга кимсан – туман ҳокими кўзини чирт юмиб имзо чекканига қойил қолмасдан иложингиз йўқ. Хўш, туманда фуқаролар мурожаатига берилган бундай ёлғон жавоблар қанча экан?

Нурилла ШАМСИЕВ,
ishonch.uz