– Шароф Рашидовнинг ҳаёти ва фаолияти тўғрисидаги янги фактлар ўтмиш қаъридан қалқиб чиқаверади. Зеро, у ўз даврининг кам учрайдиган, фавқулодда сиёсий, дипломатик иқтидорга эга арбоби эди, - дейди унинг жияни Одилжон Ҳамроқулов. - Шароф Рашидов ўша тузумда вояга етиб, сиёсий арбоб сифатида шаклланди. Ўзбекистоннинг ўша вақтдаги биринчи раҳбари сифатида хоҳласа, хоҳламаса, Москвага бўйсунар, нима иш қилмасин, Кремль раҳбарларининг азми қарори билан амалга оширарди.

Ана шундай мураккаб вазиятда унинг раҳбарлик истеъдоди, доно сиёсати туфайли саноати деярли ривожланмаган, қишлоқ хўжалиги ҳам жуда қолоқ бўлган Ўзбекистон Марказий Осиёдаги энг ривожланган республикага айланди. Шароф Рашидов Республика Коммунистик партияси Марказий қўмитасининг биринчи котиби сифатида Ўзбекистонни қарийб чорак аср бошқарди. У атиги 33 ёшида Республика Олий Кенгаши Президиуми раиси бўлди. Собиқ Совет Иттифоқида ҳеч ким бунчалик эрта ёшда ҳукуматда бу қадар юқори лавозимни эгалламаган эди.

Маълумот учун, Рашидовнинг раҳбарлик йилларида йирик саноат корхоналари — Тошкент трактор заводи, авиация бирлашмаси, метро ва ГРЭСлар фаолияти йўлга қўйилган.

Айнан унинг ташаббуси билан Мурунтов олтин кони очилди, Тошкент авиация заводи дунёнинг энг катта авиация бирлашмаларидан бирига айланди. «АН-12» ва «ИЛ-76» самолётлари ишлаб чиқарила бошланди. Шунингдек, 1966 йилги зилзиладан сўнг пойтахтни қайта тиклашда унинг дипломатик маҳорати ҳал қилувчи бўлган. Шароф Рашидов нафақат сиёсий арбоб, балки ёзувчи сифатида ҳам халқ қалбида из қолдирган. Унинг «Бўрондан кучли», «Қизлар», «Мангу дарахт» асарлари ўзбек адабиётида алоҳида ўрин тутади.

Тадбир иштирокчилари Рашидов музейига ташриф буюриб, унинг сиёсий ва ижодий меросини ёдга олишди.

Муқимбой ИСМОИЛОВ,
“Ишонч”