Ҳисоб-китобларга кўра, 500 килограмм оғирликдаги станция 9–10 май кунлари Ер атмосферасига киради.

Бир қатор манбалар 53 йил олдин “Венера-8” миссияси доирасида учирилган “Космос-482” сайёралараро космик аппаратининг қулаши геолокацияси Осиё ёки Марказий Осиё давлатлари ҳудудига тўғри келиши мумкинлигини ҳам тахмин қилмоқда.

Uzcosmos агентлиги мутахассиси мазкур космик аппаратнинг Ўзбекистонга қулаши эҳтимолини таҳлил қилди.

“Космос-482”нинг аниқ қаерга қулашини айтиш бироз мушкул. Унинг Ўзбекистон ҳудудига тушишининг эҳтимоли эса ҳозирча 0,3-0,5 фоиз оралиғида баҳоланмоқда.

Аппаратнинг катта қисми атмосферага кириши билан ёниб кетса-да, Венеранинг оғир шароитларида қўниш ва ишлаш учун мўлжалланган ярим тоннага (500 кг) яқин массали титан шари алоҳида хавф туғдиради. Бу компонент ер атмосферасига киришда омон қолади ва бутунлай қулаб тушади. Парашют борлигига қарамай, коинотда 53 йил бўлганидан кейин у ишламаслиги мумкин. Ерга урилиш тезлиги эса соатига 500 км. гача етиши кутилмоқда», – дейди Uzcosmos агентлиги бўлим бошлиғи Аҳрор Агзамов.

Қайд этилишича, бўлаклар топилган тақдирда, бу ҳақда зудлик билан расмийларга хабар бериш ва ҳеч қандай ҳолатда аппарат қолдиқлари билан алоқада бўлмаслик тавсия этилади, чунки улар таркибида хавфли кимёвий моддалар бўлиши мумкин.

Маълумот учун, собиқ Тошкент машинасозлик конструкторлик бюроси мазкур “Венера” дастурининг сўнгги босқичларида муносиб иштирок этган. У “Венера-13 ва 14” (1982) ва “Вега-1 ва 2” (1985) аппаратлари учун грунт олиш ва бурғилаш қурилмаларини лойиҳалаштирган ҳамда ишлаб чиқарган. Уларни синовдан ўтказиш эса Тошкент вилоятидаги Невич қишлоғида жойлашган синов марказида амалга оширилган.