Айни кунларда Фуқаролик ишлари бўйича Учтепа туманлараро судида Ботир Қодировнинг марҳум Шерали Жўраевнинг қонуний ўғилларига нисбатан «оталик фактини белгилаш»га оид фуқаролик низоси кўриб чиқилмоқда.

Судьялар олий кенгаши мазкур суд ишида томонларни ҳамда ОАВни турли баёнотлар ва интервьюлар бериш ва эълон қилишдан тийилишга чақирмоқда.

“Фуқаролик низоси таниқли шахслар ўртасида кечаётгани ҳамда марҳум ва машҳур инсон ҳаёти билан боғлиқлиги боис воқеалар ривожи кенг жамоатчилик томонидан катта эътибор билан кузатилаётгани, айни жараёнда иш бўйича тарафларнинг ҳолатига тушуниш билан муносабатда бўлиш мумкин. Бироқ низо судлашиш даражасига етиб, процессуал жараёнлар давом этаётган бир пайтда тарафлар (ёки уларнинг вакиллари) томонидан оммавий ахборот воситалари ва ижтимоий тармоқлардаги чиқишлари кенг муҳокамаларга сабаб бўлмоқда.

Тармоқлардаги муҳокамаларда ҳали якунига етмаган иш бўйича турли башоратларга берилишлар, суддан аввал “қарор чиқариб қўйиш” ҳолатлари мавжуд. Энг ёмони, низо судда холис ва беғараз кўрилишига асоссиз шубҳалар ҳам билдирилмоқда. Буларнинг ҳаммаси судга нисбатан ижтимоий босим пайдо қилаётганига таъкид шарт эмас”, – дейилади расмий муносабатда.

Судьялар олий кенгаши матбуот хизмати, мавжуд вазиятдан келиб чиқиб, “иш бўйича тарафларни турли шакл ва кўринишда баёнот беришдан тийилишга, журналист ва блогерларни эса шахсга оид маълумотлар ҳамда суд ишига доир ахборотларни тарқатишдек нозик ва ҳассос масалага масъулият билан” ёндошишга чақирмоқда.