Абитурент “Ахборотнома”лардаги тестларни кўзини юмиб ишлаши, дарсликлардаги қоидаларни сув қилиб ичиб юборган бўлиши керак эди. Ҳа, таълим тизимимизда кўп нарса ёдлашга асосланилар эди. Эркин фикрлаш, мустақил мулоҳаза юрита олиш унчалик муҳим эмасди.

Аммо энг аянчлиси, коррупциялашган, “бункерлашган” олий таълим кўплаб иқтидорли ёшларни синдиргани рост...

Бугун...

Миллий статистика қўмитаси 2024-2025 ўқув йили бошида мамлакатимиздаги 18-23 ёшлилар орасида олий таълим билан қамров даражаси 47,7 фоизни ташкил этганини эълон қилди.

Албатта, бу рақамларнинг ўзиданоқ талаба бўлиш 20 йил олдингидек қийин эмаслигини англаш мумкин. Қолаверса, ўзимиз ҳам амалда кўраяпмиз, бугунги ёшларга олий таълим олиш учун ҳар доимгидан ҳам аъло давр. Озгина ҳаракат ва интилиш бўлса бас. Хоҳласа юртимизда, хоҳласа хорижий тилларни мукаммал ўрганиб, чет элда ўқишлари мумкин. Тиллар ўргатишга ихтисослашган ўқув марказлари етарлича.

Бир сўз билан айтганда, олий маълумотли бўламан деган ёшлар учун ҳамма эшиклар очиқ. Олий ўқув юртларида коррупция сезиларли камайди. Квоталар оширилди. Замонавий, ўқувчилари учун қулайликларга эга кутубхоналаримиз ишламоқда, ёшларнинг ўқиб-ўрганиши учун шарт-шароитлар яратишда давом этяпмиз. Ҳаммаси ўқийман, ҳунарли бўламан деганлар учун...

Фақатгина ёшларимиз бунинг қадрига етишса бўлгани.

Миллий статистика қўмитаси берган маълумотга кўра, олий таълимга қамров кўрсаткичи сўнгги ўн йил ичида 40,9 фоизга ошган. Масалан, 2014 йилда бу рақам атиги 6,8 фоиз бўлган эди.

Йиллар кесимидаги ўсиш динамикаси:

• 2014 йил – 6,8 фоиз
• 2015 йил – 7,0 фоиз
• 2016 йил – 7,2 фоиз
• 2017 йил – 8,3 фоиз
• 2018 йил – 10,6 фоиз
• 2019 йил – 13,3 фоиз
• 2020 йил – 18,7 фоиз
• 2021 йил – 28,2 фоиз
• 2022 йил – 36,6 фоиз
• 2023 йил – 45,9 фоиз
• 2024 йил – 47,7 фоиз

Зебо Намозова
ishonch.uz