Маълум қилинишича, қиз 7-синфда ўқиётганда ота-онасининг аризасига биноан, Хоразм вилояти Болалар масалалари бўйича Урганч шаҳар комиссиясининг қарори ва буйруғи асосида ўқувчилар сафидан чиқарилган.

Кейин ота-онаси билан узоқ муддатга доимий яшаш учун Санкт-Петербург шаҳрига чиқиб кетган, бу йил февралда Ўзбекистонга қайтган. Бироқ ота-онаси ёки тегишли ташкилотлар томонидан мактабга хабар берилмаган. Қизиғи, бу ўқувчи бугунги кунда ҳеч бир мактаб рўйхатида қайд қилинмаганлиги маълум бўлган.

Нималар бўляпти? Рейд ўтказилмаса, вояга етмаган қиз раққосалик қилиб юраверармиди? Бу маълум бўлгани, холос. Ким билсин, яна қаерларда қанча вояга етмаганлар қандай ишлар қилиб юрибди? Ёшлар ишлари ва хотин-қизлар масаласида қанча ташкилотлар бюджетдан маош олиб ишлаяпти. Улар қаерга қараяпти? Бу ҳодиса атрофида Ёшлар етакчиси нега кўринмайди? Бу ҳолат бўйича халққа ҳисоб берадими?

Ютуқларга эришаётган оз сонли ёшлар билан “пиар” қилишга устамиз. Бирор ёш муваффақиятга эришиб қолса борми, ёмғирдан кейин чиққан қўзиқориндай, потирлаб ҳар томондан масъуллар чиқиб гапиришни бошлайди, қарсакларни тиндиришмайди. Лекин ёшлар билан боғлиқ маънавий фожеаларимиз қаршисида нега тилини ютиб юборишяпти? Худди ҳозиргидек…

14 ёшли қизлар мактабга бормай, тунги клубда ўйнаб юрибди, мактаб жавобгарликни зиммасига олмай, ўқувчимиз эмас деса, Хотин-қизлар қўмитаси бизнинг вазифамиз эмас деса, Ёшлар ишлари агентлиги чурқ этмаса. Ким масъул бу вазиятга? Ота боболаримизнинг бир болага 7 маҳалла масъул, деган мақоли бор эди. Ҳозирга келиб, 7 маҳаллагина эмас, бутун бошли катта ташкилотлар, минглаб одамлар ёшларга жавобгар сифатида ойлик олиб ишлайди.

Аммо қани улар?..

Мафтуна Каримова
Ishonch.uz