Шоҳимардон — бориш керак бўлган манзиллардан бири. Атрофи тўлиқ Қирғизистон ҳудуди билан ўралган Шоҳимардон Ўзбекистоннинг эксклави. Тоғлар бағридаги қишлоқ бетакрор табиати билан ҳар қандай кишини ҳайратини ошириши табиий. Бу ерга келган киши борки, дилига яна келишни тугиши шубҳасиз.

Фарғона тумани ҳудудига кирувчи бу сўлим қишлоқ ўзининг дилтортар табиати, не-не сиру синоатларни бағрида сақлаётган афсонавий тоғлар, Оқсув ва Кўксув сойларининг шарқираб оқиши, афсоналардан сўзловчи зиёратгоҳлари кишини бу ерга боришга, кўришга ундайди.

Айниқса, атроф тоғлар билан ўралган Шоҳимардон ям-яшил ўрмонлари, тоғ дарёлари ва шаффоф кўли билан машҳур. Бу ерга бир кунга келишнинг ўзи камлик қилади. Чунки бориб кўриш керак бўлган диққатга сазовор жойлар кўп. Улардан бири Кўк-Кўл. Бу жой Шоҳимардоннинг асосий диққатга сазовор жойларидан бири. Ёз мавсумида бу ерга келишнинг гашти ўзгача бўлади. Шунинг учун Шоҳимардон нафақат маҳаллий дам олувчилар билан, балки хорижлик меҳмонлар билан гавжум.

Бу ерга келиб, асло, аттанг қилмайсиз. Шоҳимардоннинг бетакрор ва ноёб табиат манзараси, атрофдаги гўзаллик фақат ҳузур бағишлайди. Гузал масканда истагингизга қараб, меҳмонхонага ёки уй меҳмонхоналарига жойлашишигиз мумкин. Асосийси, бу ернинг одамлари сизни самимийлик билан қарши олади.

Фақат Шоҳимардонга келишда хорижга чиқиш паспорти олишни унутманг. Қолгани эса фақат ёқимли саёҳат бўлади.

Жамшид Эргашев

“Ishonch”