Унинг таъкидлашича, ФПКнинг 171-моддаси биринчи қисми 5-бандига асосан ҳисобланган, лекин ходимга тўланмаган иш ҳақини ва унга тенглаштирилган тўловларни ундириш бўйича ҳам суд буйруғи чиқартириш мумкин.

Суд буйруғини чиқартириш учун, фуқаролик ишлари бўйича судга иш берувчининг иш ҳақидан қарздорлигини тасдиқловчи ҳужжатни илова қилиб, иш ҳақи тўловларини ундириш бўйича суд буйруғи бериш тўғрисида мурожаат қиласиз. Аризага иш ҳақи ундиришга асос бўлган ҳолатларни — ишга қабул қилиш ҳақидаги буйруқ, иш ҳақи даромадларингиз ҳақидаги маълумотномани ҳам илова қилишингиз керак.

Шунда ортиқча суд мажлислари ва муҳокамаси ўтказилмасдан, иш берувчи томонини чақириб ўтирмасдан, 3 кун ичида суд буйруғи чиқариб берилади. Мазкур суд буйруғи берилган кундан бошлаб, 10 кундан сўнг кучга киради. Бу дегани, 10 кундан кейин, ўша суд буйруғини МИБга берсангиз, МИБчилар иш ҳақингизни бир зумда ундириб беради. МК 562-моддасига асосан, судга ортиқча давлат божи ҳам, почта ҳаражатлари ҳам тўлаб ўтирмайсиз. Жуда қулай нарса.

Таққослаш учун, дейлик, 20 млн. сўмлик иш ҳақингизни ундириш учун судга даъво аризаси киритсангиз, бўлиб ўтадиган суд жараёнлари билан бирга, ўртача 2 ойда ҳал қилув қарорини олишингиз мумкин. Шунда ҳам, бу қарор 1 ойдан кейин кучга киришини эътиборга олсак, ижро варақаси (МИБга бериладиган ҳужжат)ни олишга яна 1 ой вақт кетади. Демак, 3 ой судма-суд юрасиз.

Суд буйруғи бўйича ариза берганингизда эса, суд буйруғини олишга 3 кун, МИБга топширишга 10 кун, хуллас, узоғи билан 15 кун вақт кетади.

ishonch.uz