Саволга Ўзбекистон касаба уюшмалари Федерациясининг Навоий вилояти кенгаши меҳнат-ҳуқуқ инспектори Алишер Раҳматов қуйидагича жавоб берди:

— Ходим қуйидаги ҳолларда ҳар йилги меҳнат таътилини узайтириш ёки бошқа муддатга кўчириш ҳуқуқига эга:

— вақтинча меҳнатга қобилиятсизлик даврида;

— ҳомиладорлик ва туғиш таътилининг муддати бошланганда;

— ҳар йилги меҳнат таътили ўқув таътилига тўғри келиб қолганда;

— давлат ёки жамоат мажбуриятларини бажариш даврида;

— жамоа келишуви ёки жамоа шартномасида назарда тутилган бошқа ҳолларда.

Ходим меҳнат таътилидан фойдаланишга тўсқинлик қилувчи сабаблар вужудга келганда, бу ҳақда иш берувчини ёзма равишда хабардор этиши шарт.

Ходимнинг ҳар йилги меҳнат таътили қонун билан кафолатланган ҳуқуқ ҳисобланади. Агар таътил даврида ёки таътил бошланиши арафасида юқорида санаб ўтилган ҳолатлар юзага келса, таътилни

• узайтириш (масалан, касаллик кунлари ҳисобидан);
• ёки бошқа муддатга кўчириш мумкин.

Масалан, агар ходим таътил пайтида вақтинча меҳнатга лаёқатсиз бўлиб қолса ва бу ҳолат тиббий маълумотнома билан тасдиқланса, касаллик кунлари таътил кунларига қўшилмайди.

Шу кунлар миқдорида таътил узайтирилади ёки бошқа вақтга кўчирилади.

Шунингдек, агар таътил муддати ўқув таътили, ҳомиладорлик ва туғиш таътили ёки давлат вазифаларини бажариш даврига тўғри келса, ходим таътилни бошқа қулай вақтда олишни талаб қилиш ҳуқуқига эга.