Аргентина паспортини инвестиция орқали олиш мумкин
Аргентина ҳукумати хорижликларга инвестиция эвазига фуқаролик олиш имконини берувчи янги дастурни эълон қилди. Ариза қабул қилиш жараёни 2026 йилнинг тўртинчи чорагида бошланиши режалаштирилган.
Дастур бўйича фуқаролик олишнинг икки йўли таклиф қилинмоқда. Биринчи вариантда мамлакат Ғазначилигига 350 минг доллар миқдорида қайтарилмайдиган маблағ киритиш керак. Иккинчи вариантда эса дастур учун махсус чиқариладиган 800 минг долларлик давлат облигациясини сотиб олиш мумкин.
Дастурда оила аъзолари учун ҳам алоҳида шартлар белгиланган. Турмуш ўртоғи ва 18 ёшдан 25 ёшгача бўлган, никоҳдан ўтмаган ва фарзанди бўлмаган фарзандлар 100 минг долларлик бадал орқали фуқароликка ариза бериши мумкин. 18 ёшга тўлмаган фарзандлар учун бу сумма 25 минг доллар этиб белгиланган. Бу ҳақда Аргентина Иқтисодиёт вазирлиги маълум қилган.
