Янги Тошкентда йирик инвесторларга ер 1 доллардан берилади
Янги Тошкент шаҳри ва Самарқанддаги «Ширин» массивида йирик шаҳарсозлик лойиҳалари учун махсус ҳуқуқий режим жорий этилди. Бу Президентнинг 10 ноябрдаги фармонида белгиланган.
Унга кўра, қиймати 50 миллион доллар ва ундан ортиқ бўлган инвестиция лойиҳаларига қатор имтиёзлар берилади. Хусусан, инвестиция ҳажмига қараб, объектни ижарага бериш ва сотишдан олинадиган фойда солиғи 5 йилдан 15 йилгача 1 фоиз этиб белгиланади. Шунингдек, инвесторлар 20 йилга мол-мулк ва ер солиғидан озод қилинади.
Ер участкалари очиқ аукцион орқали ижарага берилади. Бир квадрат метр ернинг бошланғич нархи инвестиция миқдорига қараб 200 доллардан 1 долларгача белгиланган. Жумладан, 500 миллион доллардан ортиқ сармоя киритадиган инвесторлар учун 1 долларлик нарх қўлланади.
Бундан ташқари, инвесторлар қурилиш техникаси, асбоб-ускуналар ва материалларни олиб киришда божхона божидан озод этилади. Хорижий мутахассислар учун ҳам солиқ ва ишлаш тартиби бўйича имтиёзлар назарда тутилган.
Қурилиш ишларини жадаллаштириш мақсадида лойиҳалаш ва қуришни бир вақтда амалга ошириш, халқаро техник нормалардан фойдаланиш ҳамда қурилиш-монтаж ишларини 24/7 режимида олиб боришга рухсат берилади.
Инвесторлар ерни олганидан кейин кўпи билан олти ой ичида қурилишни бошлаши шарт.
Фармонга мувофиқ, жамоат эҳтиёжлари учун олиб қўйиладиган ерлар мулкдорларига компенсация тўлаш учун 2026 йил 15 декабрга қадар Янги Тошкент дирекциясига 260 миллиард сўм, «Ширин» массиви дирекциясига эса 200 миллиард сўм ажратилади.
