Ушбу тасвирларда кўринадики, туман солиқ инспекцияси ходими мактаб маъмурлари иштирокида жорий ўқув йилининг биринчи куниёқ бошланғич синф (айрим манбалар 2 синф эканини айтмоқда, -таҳр.) ўқувчиларидан солиқ ундиришда фойдаланган. Яъни у болаларга солиқларни тўлаб қўйиш талаб қилинган қоғозчаларни тарқатиб уни ота-оналарига олиб боришларини сўраган.

“Янги ўқув йили билан ҳаммангизни табриклайман, ўқишингизга омад. Биз Нишон туман солиқ инспекциясидан келяпмиз. Сизларга эслатма бу. Ҳаммангиз ота-онангизга олиб борасиз. Яшаб турган жойингизнинг мол мулк ва ер солиқларини солиқ инспекциясига бориб, ёки телефонда солиқ иловасидан тўлашлари керак. Шуни илтимос қиласизлар. Уй кимнинг номида бўлса, бориб, ҳисоблаб тўлайди”, – дейди ходим.

Ўз навбатида, солиқ ходими синф болаларига Конституциянинг фуқароларнинг белгиланган солиқ ва йиғимларни тўлаши шартлиги айтилган 63-моддасини ўқиб эшиттирган.

Давлат солиқ қўмитаси мазкур ҳолат юзасидан муносабат билдириб, Қашқадарё вилоятида бўлган ҳолатни «ноўрин хатти-ҳаракат деб ҳисоблашини ва кескин қоралаши»ни билдирган.

Камчиликларга йўл қўйган ходимларга нисбатан хизмат текшируви тайинланган.

Эслатиб ўтамиз, ўтган йилнинг ёз ойларида Тошкент шаҳар Учтепа туманидаги давлат МТМларининг бирида туман ИИБ ходимлари тарбияланувчиларга “оқ билан қорани фарқлаш, бир ишни қилишдан олдин оқибатини ўйлаш” ҳақида насиҳат қилган эдилар.