ishonch.uz нинг бугунги қаҳрамони — Азизбек Зайлобиддинов, Тошкент халқаро Вестминстер университети қошидаги академик лицейнинг 2-босқич ўқувчиси. У 17 ёшида IELTS имтиҳонидан 8, SAT имтиҳонидан 1520 балл тўплаб, дунёнинг энг нуфузли олийгоҳларидан бири — Ҳарвард университетига 100 фоизлик (360 минг долларлик) грант ютган. Бугун унинг ютуғи миллионлаб ёшлар учун илҳом манбаи бўлиб хизмат қилмоқда. Яқинда у Президентимиз билан учрашиш бахтига муяссар бўлди.

Президент билан учрашув: илҳом ва фахр

“2025 йил 14 февраль менинг ҳаётимда муҳим сана бўлиб муҳрланди. Шу куни давлатимиз раҳбари биз, ёшлар билан самимий мулоқот ўтказди. Учрашув давомида ёшларга яратилаётган имкониятлар ҳақида эшитар эканман, ўз мамлакатимнинг фарзанди эканимдан фахрландим. Келажагимиз бугунгидан ҳам ёруғ бўлишига ишончим ортди. Айниқса, эҳтиёжманд оилалар фарзандларини чет элда ўқитиш ташаббуси менда катта таассурот қолдирди.”

Муҳим қадамлар ва меҳнат ортидаги муваффақият

“Мен 2007 йилда Фарғона вилоятида туғилганман. Ҳозирда Тошкент халқаро Вестминстер университети қошидаги академик лицейда таҳсил оляпман. Ортда қолган 2024 йил мен учун унутилмас воқеаларга бой бўлди. Декабрь ойида Ҳарвард университетидан 360 минг АҚШ доллари миқдоридаги грантни ютдим. Бу ютуқ осонликча қўлга киритилмади. Нуфузли олийгоҳлардан тўлиқ грант ютиб олиш учун билимнинг ўзи камлик қилади. Бу жараёнда номзодларнинг ижтимоий фаоллиги ҳам катта аҳамиятга эга. Шу боис мен кўплаб ижтимоий лойиҳаларда фаол қатнашдим.”

“Ибрат Дебате” лойиҳаси ва ижтимоий фаоллик

“Ҳозирда Ёшлар ишлари агентлиги ташаббуси билан ташкил этилган “Ибрат фарзандлари”нинг “Ибрат Дебате” лойиҳасига раҳбарлик қиляпман. Лойиҳамизнинг асосий мақсади — инглиз тилини яхши билувчи ёшлар орасида дебатлар ташкил этиш. Шу кунга қадар 100 га яқин дебат ўтказилиб, уларда 3000 дан ортиқ ёшлар иштирок этди. Лойиҳада 100 дан зиёд волонтёрлар фаолият юритмоқда.”

Келажакка интилиш ва мақсадлар

“Олдимга қўйган мақсадларим кўп. Улардан энг асосийси — нуфузли олийгоҳда таълим олиб, орттирган билим ва кўникмаларимни юртимиз равнақи йўлида ишлатиш, танлаган йўналишим — иқтисодиётнинг ривожига ҳисса қўшиш. Биз ёшлар бирлашсак, улкан кучга айланамиз. Биздан талаб этиладигани — билимнинг қудратини вақтида англаб, имкониятлардан унумли фойдаланиш ва ютуқларимизни юрт равнақига сарфлаш.”

Азизбек Зайлобиддиновнинг муваффақияти — изчиллик, билим ва ижтимоий фаоллик орқали катта натижаларга эришиш мумкинлигининг ёрқин намунасидир. Унинг ютуғи нафақат шахсий ғалаба, балки ўзбек ёшлари учун йўл харитаси бўлиб хизмат қилади.

Феруза Раҳимова
Қувонч Тўраев
Ishonch.uz