Марҳума З.Ғ эндигина 29 ёшга тўлган аёл, бир фарзанднинг онаси эди. Маълум бўлишича, у Юқори Чирчиқ туманидаги 17-сонли мактабгача таълим ташкилотида тарбиячи ёрдамчиси бўлиб ишлаган. Иш бошлаганига икки ой бўлган З.Ғ одатий иш кунларининг бирида муассаса раҳбарининг топшириғига кўра, трансформатордаги электр истеъмоли кўрсаткичини суратга олмоқчи бўлган. Юқори кучланишга эга бўлган трансформаторнинг эшигини очиб, суратга олаётганида бахтсиз ҳодиса юз берган ва у олган тан жароҳатлари оқибатида тез ёрдам ходимлари етиб келгунича вафот этган.

Шундан сўнг, унинг вафоти бўйича суриштирув ишлари олиб борилди. Мутахассислар томонидан мазкур бахтсиз ҳодиса муассаса раҳбари ушбу ходимга унинг вазифасига кирмайдиган топшириқни берганлиги сабабли юз берганлиги таснифланди. Шундан сўнг, Ўзбекистон касаба уюшмалари Федерацияси Тошкент вилояти кенгаши томонидан марҳуманинг вояга етмаган фарзандига бирйўла тўланадиган нафақа ҳамда бола вояга етгунига қадар ҳар ойда тўланадиган зарарни тўлаб бериш бўйича тақдимнома киритилди. Бироқ, ташкилот томонидан ушбу тақдимнома талаблари бажарилмади.

Иш судга оширилди. Бир неча марта бўлиб ўтган суд мажлисларидан сўнг, яқинда марҳуманинг фарзанди учун бирйўла тўланадиган 107 млн сўм миқдорида пул ундирилиши ҳақида қарор чиқарилди. Шунингдек, унинг фарзанди вояга етгунига қадар ҳар ойда 700 минг сўмдан зиёд зарар пуллари тўлаб борилиши қатъий белгиланди. Юқори Чирчиқ тумани Мактабгача ва мактаб таълими бўлимидан Давлат фойдасига 5 млн 394 минг сўм миқдорида давлат божи ҳам ундириладиган бўлди.

Шокир Хазраткулов,
Ўзбекистон касаба уюшмалари Федерацияси
Тошкент вилояти кенгаши меҳнат-техник инспектори