Тошкент вилояти Нурафшон шаҳри, "Нурафшон" маҳалласида яшовчи Д.Эргашева турмуш ўртоғи ва икки, бир ёшли болалари билан кўчада яшаб келаётганини маълум қилди.

– Ижарада турган уйимизнинг эгаси билдирмасдан уйни сотиб юборибди, – дейди Д.Эргашева. – Ваҳоланки, у билан ижара шартномаси тузиб, бир йиллик пулни тўлаган эдик. Бунинг учун турмуш ўртоғим кредит олган эди. Энди эса ҳам банкдан қарздормиз, ҳам кўчада қолдик. Турмуш ўртоғим ит овловчи бўлиб ишлайди, ойлиги жуда кам. Мен эса, ёш болалар билан ҳозирча ҳеч қаерда ишлолмайман. Маҳалла раиси, ҳокимга бир неча марта учрашдик. Аммо фойдаси бўлмади. Иложсиз кўчада юрибмиз. Болаларимга сутли бўтқа бераман. Уни ҳам ҳар кимнинг уйида пишириб оляпман.
Кундузи кўчаларда юмуш қилиб болалар билан бирга айланиб юрамиз, кечаси эса бир жойда тўхтаб мотоциклнинг аравачасида ухлаймиз. Кеча тунда ҳаво бироз салқин бўлгани учун катта фарзандимнинг томоғи шишиб кетган. Уни ўз ҳолимча даволаяпман. Шундай сарсон бўлиб юраверамизми, наҳотки бизга ҳеч ким ёрдам бермаса?..

Д.Эргашеванинг қўшимча қилишича, унга маҳалла идорасидагилар ишлашни таклиф қилишган. Кимдир эса, бирор жойга палатка тикиб олишни маслаҳат берган. Аёл болаларининг ёши жуда кичик бўлса ҳам ишлашга рози, аммо уларнинг овқатига, хавфсизлигига кимдир қараши керак. Хуллас, чорасиз қолган она айни пайтда ҳар эшикка бош уриб кўрмоқда. Мутасаддилар тез орада бунга ечим топиб, чора кўрадилар, деган умиддамиз.