Бензинли автомобиллар улуши 50 фоиздан пастлади
2026 йилнинг биринчи ярмида бензин двигателли автомобилларнинг жаҳон янги автомобиллар савдосидаги улуши илк бор 50 фоиздан пастлаб, 49 фоизни ташкил этди. Бу ўтган йилга нисбатан 3 фоизга кам. 2021 йилда эса ушбу кўрсаткич 73 фоиз эди.
“Mobility Global” маълумотларига кўра, январь–июнь ойларида дунё бўйича 20,25 миллионта бензинли автомобиль сотилган. Бу йиллик ҳисобда 10 фоизга кам. Савдо Хитойда 26 фоизга, Европада 13 фоизга қисқарган.
Электромобиллар савдоси 12 фоизга ўсиб, 6,87 миллионтага етган ва жаҳон бозорининг 17 фоизини эгаллаган.
Хитойда электромобиллар савдоси 3 фоизга, Шимолий Америкада 15 фоизга камайган. Европада эса 32 фоизга ўсиб, 1,81 миллионтага етган. Жануби-Шарқий Осиёда ўсиш 81 фоизни, Океанияда эса 2,2 баробарни ташкил этган.
