Давлатимиз раҳбари Ўзбекистон – Корея бизнес форумида иштирок этди
Ўзбекистон Республикаси Президенти Шавкат Мирзиёев ва Корея Республикаси Бош вазири Хан Сон Сук қўшма бизнес форумнинг очилишида иштирок этдилар.
Тадбирда икки мамлакат давлат тузилмалари ва ишбилармон доираларининг 300 нафардан зиёд вакили, жумладан, етакчи молия институтлари, йирик саноат корхоналари ва савдо компаниялари раҳбарлари иштирок этди.
Давлатимиз раҳбари ўз сўзида Корея Ўзбекистоннинг вақт синовидан ўтган дўсти ва алоҳида стратегик шериги эканини, савдо-иқтисодий ва инвестициявий ҳамкорлик эса Ўзбекистон – Корея кўп қиррали ҳамкорлигининг устувор йўналишларидан бирини ташкил этишини таъкидлади.
Мамлакатимиз етакчиси томонидан Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини яратиш таклиф этилди.
Президентимиз келгусида иқтисодий шерикликни янада ривожлантиришнинг асосий йўналишларини белгилаб берди.
Хусусан, саноат кооперациясини ривожлантириш ва ишлаб чиқаришнинг тўлиқ занжирларини шакллантириш, энергетика ва “яшил иқтисодиёт”, транспорт ва замонавий инфратузилма, рақамлаштириш ҳамда сунъий интеллект, яримўтказгичлар ва микроэлектроника, биотехнология ва фармацевтика, қўшма илмий тадқиқотлар ўтказиш, илғор технологияларни жорий этиш, кадрлар тайёрлашда ҳамкорлик қилиш ва бошқа йўналишлар кўрсатиб ўтилди.
