Маълум бўлишича, Навоий вилояти Зарафшон шаҳрида яшовчи ёлғиз она, икки нафар вояга етмаган фарзанд тарбиялаётган фуқаро Ойдин Хожиева 2019 йилда кўп қаватли уй олиш мақсадида “MIRONSHOH BUILDING” МЧЖ директори Равшанова Наргизага 16 000 000 сўм маблағ тўлаган. Шунингдек, унинг опаси Турдибуви Эргашева ҳам ёлғиз боқувчи бўлгани сабабли, гаров сифатида 40 грамм тилла ва 4 000 000 сўм пул берган.

Шартномага кўра, иккала фуқарога ҳам бир хонали уй-жой ажратилиши керак бўлган ва уй-жойлар 2022 йил сентябрь ойида топширилиши белгиланган. Бироқ белгиланган муддатда қурилиш ишлари якунланмаган, фуқаролар эса на уй-жой, на тўлаган маблағларини қайтариб ола олган.

2025 йил 4 октябрь куни фуқаро пул маблағларини қайтариб олиш мақсадида компанияга мурожаат қилиб, ариза ёзган. Бироқ компания томонидан унинг шартномаси олиб қўйилган ва маблағлар қайтарилмаган.

Шундан сўнг фуқаро Ўзбекистон касаба уюшмалари Федерациясининг “Хотин-қизлар муаммолари бўйича 1211 ишонч телефони”га мурожаат қилади. Мазкур мурожаат касаба уюшмалари томонидан назоратга олиниб, Зарафшон шаҳар прокуратураси билан ҳамкорликда ўрганилади.

Кўрилган чора-тадбирлар натижасида фуқарога 16 000 000 сўм пул маблағи тўлиқ қайтариб берилди. Мазкур ҳолат хотин-қизларнинг ҳуқуқ ва манфаатларини ҳимоя қилиш, уларнинг муаммоларига амалий ечим топишда 1211 ишонч телефони самарали механизм эканини яна бир бор тасдиқлади.

Умид Худойқулов.