Партия ўз расмий баёнотида таъкидлашича, пойтахтда 14 мингга яқин тўхташ жойлари қисқа вақт ичида ташкил этилгани қувонарли, аммо белгиланган тарифлар ва маблағлар ҳаракатида очиқликнинг етишмаслиги аҳоли орасида норозиликка сабаб бўлмоқда.

Маълум қилинишича, ҳозирда пойтахт кўчаларида автомобил тўхтатиш нархи соатига 12 минг сўмдан бошланади. ХДПнинг фикрича, бу тариф миқдори қўшни давлатлардаги амалиётга нисбатан бир неча баробар қиммат бўлиб, иқтисодий мантиқ ва ижтимоий адолат мезонларига мос эмас.

Партия қуйидаги масалаларга алоҳида эътибор қаратмоқда:

Биринчидан, ҳар қандай оммавий хизмат учун тариф белгилашда аҳолининг реал даромадлари, ижтимоий ҳимоя даражаси ва ҳаётий эҳтиёжлари инобатга олиниши керак.

Иккинчидан, пулли тўхташ жойларидан тушаётган маблағларнинг қай тарзда шаклланаётгани ва қаерга сарфланаётгани очиқ-ошкора эълон қилиниши лозим.

ХДПга кўра, пойтахтда транспорт тизимини ривожлантириш муҳим вазифа бўлса-да, ҳар бир қарор инсон манфаати, ижтимоий адолат ва қулайлик тамойилларига асосланиши шарт.