“Ishonch” газетасининг шу йил 24 август №106 сонида “Педагоглар тиббий кўрикдан ўтиши шартми?”, “Ishonch. uz сайтида “Педагоглар тиббий кўрикдан қачон ўтади” сарловҳали мақолалар эълон қилинган эди. Уларда мактаб ва мактабгача таълим муассасалари ходимларининг мажбурий тиббий кўрикдан ўтишда дуч келаётган муаммолари қаламга олинганди. Гарчанд мамлакатимизда соҳа ходимларини мажбурий тиббий кўрикдан бепул ўтишлари қонунлар асосида мустаҳкамлаб қўйилишига қарамасдан, бу амалиёт қарийиб ўн йилдан ошиқ муддат мобайнида маблағ важи рўкач қлиниб пайсалга солиниб келинаётганди. Жорий йилда ҳам қатор ҳудудларда ишловчи педагог ходимлар айни муаммога дуч келишди.

Ниҳоят молия ва мактаб олдига ҳар йили кўндаланг бўлаётган масала ҳал бўлди.

– Қатор йиллардирки бу масалага бюджетдан маблағ ажратилмаганлиги қатор тушунмовчилик ва муаммоларни туғдириб келаётганди,-дейди Пайариқ туман СЭОМ раҳбари Маъруф Бурхонов. – Ўтган йили ҳам бу йил ҳам касаба уюшмалари талаби билан бу тадбирни “насия”га амалга оширдик. Гарчанд иқтисодий томондан зарар кўрсак-да ўқитувчиларни чиқимдор қилмаслик пайида бўлганмиз.

Ижтимоий тармоқларда жорий йилнинг 26 август куни Ўзбекистон республикаси Иқтисодиёт ва молия, Соғлиқни сақлаш ҳамда Мактабгача ва мактаб таълими вазирликлари имзолаган қўшма баёноти эълон қилинди. Унда вазирликларнинг ҳудудий бошқармаларига педагогларнинг бир йилда бир маротаба бепул мажбурий тиббий кўрикдан ўтишларини таъминлаш вазифаси юклатилади. Бу йўналишга давлат бюджети ҳисобидан жорий йилда 71,4 миллиард сўм ажратилганлиги эсатилиб, ушбу маблағлар тиббиёт муассасаларининг тегишли харажатлар сметаларига режалаштирилганлиги айтилади. Демак энди пулдан муаммо йўқ.

Ўқитувчи ва мураббийларнинг аксар қисми “йўли”ни қилиб бу “имтиҳон”дан ўтиб бўлган эрсада бу хушхабар барчани маманун этганлигига шубҳа қилмаймиз.

Нурилла Шамсиев,
“Ishonch”.uz