Ойликни вақтида олмаганимиз учун компенсация тўланадими?

501 16:29 | 20.11.2023 16:29

– Мен давлат ташкилотида ишлайман. Ойлик маошимиз доим ойнинг 4-5 саналарида тушади. Аммо кўпчилик ҳамкасбларимиз банкдан кредит олган ва улар вақтида кредитни тўламаётганликлари учун кредит фоиз туғаяпти. Аслида, қонун бўйича ойлик маош нечанчи санагача берилиши лозим? Кечиккан саналар учун бюджет ташкилотлари ходимларига компенсация тўланадими?

Барнохон Юлдашева

Саволга Касаба уюшмалари Федерациясининг меҳнат ҳуқуқлари бўйича юристи Дилбар Мухамедалиева жавоб беради:

– Ходимларга иш ҳақи тўлаш муддатлари («ойнинг 1 санасидан 5 санасигача», «1 санасидан 10 санасигача» каби муддатлар билан) жамоа шартномасида ёки ички ҳужжатда, улар мавжуд бўлмаганда эса меҳнат шартномасида аниқ кўрсатилган бўлади. Иш ҳақи ҳар ярим ойда бир мартадан кам бўлиши мумкин эмас. Ходимларга ойлик иш ҳақи, қоида тариқасида, ўн олти кундан кўп бўлмаган танаффус билан икки қисмга бўлинган ҳолда (бўнакда ва қолган қисми миқдорида) тўланади (МКнинг 253-моддаси).

Юқоридагиларни инобатга олган ҳолда ташкилотингиз жамоа шартномасида ойлик иш ҳақини тўлаш муддатлари кўрсатилган бўлиши керак. Агар бу кўрсатилган муддат Сизларга маъқул бўлмаса, жамоа шартномасига ўзгартириш киритиш бўйича ташкилот касаба уюшма қўмитасига таклиф билан мурожаат қилишингиз мумкин.

Иш берувчи иш ҳақини тўлаш кечиктирилганлиги учун ходим олдида ушбу Кодекснинг 333-моддасида белгиланган миқдорда моддий жавобгар бўлади.

Иш берувчи иш ҳақини, таътил тўловларини, меҳнат шартномаси бекор қилингандаги тўловларни ва (ёки) ходимга тўланиши лозим бўлган бошқа тўловларни тўлаш муддатини бузган тақдирда, уларни тўлов муддатидан кейинги кундан эътиборан то ҳақиқатда ҳисоб-китоб қилинган кунни ўз ичига олган муддатгача ҳар бир кечиктирилган кун учун Ўзбекистон Республикаси Марказий банкининг ўша вақтда амалда бўлган қайта молиялаштириш ставкасидан келиб чиққан ҳолда фоизлар (пулли компенсация) билан бирга тўлаши шарт.

Ходимга тўланиши лозим бўлган пулли компенсациянинг миқдори Ўзбекистон Республикаси Марказий банки қайта молиялаш ставкасининг ўн фоизи миқдорида белгиланади.

Ушбу модданинг иккинчи қисмида белгиланган, ходимга тўланадиган пулли компенсациянинг миқдори жамоа шартномаси, ички ҳужжат ёки меҳнат шартномаси билан оширилиши мумкин. Мазкур пулли компенсацияни тўлаш мажбурияти иш берувчининг ойлик иш ҳақини ёки ходимга тўланиши лозим бўлган бошқа тўловларни тўлашнинг кечиктирилишида айби бор-йўқлигидан, давлатга қарашли ёки хусусий ташкилот бўлишидан қатъи назар юзага келади.

Ishonch.uz