Режиссёр Сайфиддин Мелиев томонидан саҳналаштирилган бу асар ўткир эмоционал сюжетга эга. Унда маҳоратли актрисалар Илмира Раҳимжонова ва Моҳичеҳра Исломова иштирок этган.

Бу асарда бош қаҳрамонлар — она ва қизнинг ота вафотидан кейинги зиддиятли муносабати тасвирланган. Айниқса, отанинг қиз фарзанд ҳаётидаги ўрни , муҳаббати ва қўллаб-қувватлаши қанчалик муҳим эканлиги кўрсатилган. Оиланинг ўзаги бўлган ота образининг йўқлиги фарзандга нечоғлик катта зарба бўлгани очиб берилган.

Спектаклнинг диққатга сазовор жиҳати унинг минималистик ёндашувида: саҳнада бирон-бир эркак персонаж қатнашмаган бўлса-да, отанинг руҳи ва унинг йўқлиги ҳар бир дақиқада ҳис этилади.

Илмира Раҳимжонова ва Моҳичеҳра Исломованинг ижроси таҳсинга сазовор. Уларнинг ўртасидаги диалоглар ва ҳиссиётларнинг жўшқин ифодаси, томошабинни ўз-ўзига саволлар беришга ва ўз оиласидаги муносабатларни қайта кўриб чиқишга мажбур қилади.
Режиссёр Сайфиддин Мелиевнинг асарга ижодий ёндашуви, драматургиянинг чуқур қатламларини очиб беришга хизмат қилган. Саҳнанинг ҳар бир детали, актёрларнинг ижроси ва мусиқанинг уйғунлиги асар ғоясини мукаммал етказиб берган.

Аюб Шаҳобиддинов, режиссёр:
–“Art house Hamsa” театри репертуари билан танишман. Бундан олдинги “Қизил олма” спектаклига ҳам келгандим. “Ота” эса мен учун кутилмаган воқелик бўлди. Туркий халқлар билан муносабатимиз тобора яхшиланаётганини санъатимизда ҳам кўриб бормоқдамиз.

Озарбайжонлик драматург Исмаил Иманнинг асари бугунги долзарб муаммоларимизни яққол кўрсатиб берибди. Кичкина асарда катта муаммолар икки инсоннинг диалоги ва деталлари орқали очиб берилган. Она ва қиз отанинг бевақт вафотидан сўнг, маънавий инқирозга юз тутади. Айниқса, қизнинг ҳаётида отасизлик яққол сезилади. Кўнглидаги кемтикликни турли жойлардан излайди, бироқ ота бера оладиган меҳрни топа олмайди. Режиссор биргина отанинг чемоданидаги кичик деталлар орқали ҳам унга ота руҳиятини қўша олган ва буни аъло даражада уддалаган.

Пьеса халқаро театр доираларида юксак эътироф этилган. Турли номинацияларда мукофотлар олган. Асарнинг ўзбек тилидаги талқини эса, бутунлай драмага бойлиги билан фарқ қилади.

Мазкур спектакл нафақат театр мухлислари учун, балки оилавий қадриятларни қадрлаган ҳар бир инсон учун муҳим хулосалар чиқариш имконини берувчи асардир.

Феруза РАҲИМОВА,
ishonch.uz
Фото: Марварида Исроил