Вазирлар Маҳкамасининг 2025 йил 13 сентябрдаги 578-сонли қарори билан 2017 йил 20 июнда қабул қилинган 393-сонли қарор ўз кучини йўқотган. Мазкур эски қарорга мувофиқ, кириш имтиҳонларида 56,7 балдан кам натижа кўрсатган абитуриентлар биринчи ўқув йилида таълим йўналиши бўйича энг юқори контракт миқдорининг 2 баробаригача тўлов амалга ошириш шарти билан ўқишга қабул қилиниши мумкин эди. Эндиликда ана шу тартиб бекор қилинди.

Янги қарорга кўра, тўлов-контракт миқдори энди базавий тўлов-контракт миқдорига нисбатан табақалаштирилган ҳолда белгиланади:

1,05 баллгача етмаганлар – базавий контрактнинг 1,5 баробари;

1,06–2,05 балл оралиғи – 2,0 баробари;
2,06–3,05 балл оралиғи – 2,5 баробари;
3,06–4,05 балл оралиғи – 3,0 баробари.

Қабул чегарасига 4,05 баллдан ҳам ортиқ етмаган абитуриентлар учун эса тўлов миқдори олий таълим муассасаси раҳбари томонидан базавий контрактнинг камида 3,0 баробари этиб белгиланади.