Биринчи 1,2 минг бош “Баят” зотли қўйлар самолёт орқали юртимизга етказиб берилди.Ушбу ташаббус Ўзбекистонда чорвачилик соҳасида халқаро миқёсдаги янги босқични бошлаб беради. Наслли қўйларнинг олиб келиниши туман чорвачилиги самарадорлигини ошириш, гўшт ва сут маҳсулотлари ҳажмини кўпайтириш ҳамда маҳаллий захираларни янада мустаҳкамлашга хизмат қилади.

Мўғулистон чорвачиликда дунёга машҳур давлатлардан бири бўлиб, бу ҳамкорлик икки томонлама иқтисодий алоқаларнинг янада мустаҳкамланишидан далолатдир. Айниқса, Президентимизнинг Мўғулистон давлатига расмий ташрифи чоғида эришилган келишувлар натижасида ушбу лойиҳа рўёбга чиқаётгани алоҳида аҳамият касб этади. Давлат раҳбарининг ташрифи давомида икки мамлакат ўртасидаги савдо-иқтисодий, қишлоқ хўжалиги ва чорвачилик йўналишларида ҳамкорликни кенгайтириш бўйича қатор келишувларга эришилгани Китоб туманидаги ушбу ташаббуснинг амалий ифодасидир.

Қўйларнинг соғлиғи ва иқлимга мослашиш жараёни туман чорвачиликни ривожлантириш ҳамда ветеринария бўлими томонидан қатъий назорат остида олиб борилмоқда.

Мутахассисларнинг фикрича, “Баят” зотли қўйлар юқори маҳсулдорлиги ва касалликларга чидамлилиги билан ажралиб туради, бу эса тумандаги гўшт маҳсулотлари ҳажмини янада оширишга хизмат қилади.

Фермер келгусида қўйлар сонини яна 10 минг бошга ошириш ниятида.

Баҳодир ҲАЛИМОВ,
ishonch.uz