Мана салкам бир йил бўляптики, “Ўзбекистон темир йўллари” компанияси 2023 йил 20 октябрдан бошлаб, маҳаллий йўналишдаги йўловчи поездлари чипталарининг нархини 50 фоизга, “Афросиёб“ тезюрар электр поездлари чипталарининг умумий нархини эса, 100 фоизга оширди. Қизиғи, компания бу хизматлар нархининг оширилишини темир йўл соҳасидаги олиб борилаётган ислоҳотлар, дея изоҳлади.

Шу кунларда ижтимоий тармоқларда нарх-наво оширилгани ва хизмат кўрсатиш сифатининг яхши эмаслиги йўловчилар норозилигига сабаб бўлаётганлигига гувоҳ бўляпмиз.

Аслида, хизмат сифати ва харажатлари чипта нархида акс эттирилиши керак эмасми?!

Келинг, узоққа бормайликда, электр энергияси ва табиий газга лимитлар қўйилишини ҳам эсласак. Аслида олдиндан юз фоиз тўлов амалга оширилса-да, аввалгидан ҳам аянчли аҳволга тушаётган аҳолининг ҳолатини тушуниш мумкин. Чунки, электр энергияси ва табиий газ етказиб беришда аввал аҳён-аҳёнда узилишлар кузатилган бўлса, ҳозирга келиб, узилишлар сони кўпайса кўпайяптики, озаймаяпти.

Табиий савол туғилади: монополистларимиз ( темирйўлчилар, энергетика ходимлари,) ислоҳотлар тарифларнигина ошириш эмас, аҳолининг оғирини енгил қилиб, уларга қулайлик яратиш эканлигини қачон тушуниб етишади?

Бундан шундай хулоса келиб чиқяптики, илгари энергетика ва транспорт монополияларидаги самарасизлик ва коррупция давлат томонидан молиялаштирилган бўлса, эди охир-оқибат ҳар бир фуқаро – солиқ тўловчи ҳисобидан, янаям тўғрироғи, бевосита истеъмолчилар томонидан молиялаштириляптими?

Анваржон Ҳалимов,

ishonch.uz