Вазиятга ойдинлик киритиш мақсадида “Тошшаҳартрансхизмат”АЖ бош ҳисобчиси Зебо Шожалилова билан суҳбатлашдик.

— Авваламбор, ойликларнинг кечикишига корхонамизда сўнгги ойларда юзага келган молиявий қийинчилик ва ҳайдовчиларнинг иш ҳақини ҳисоб-китоб қилишдаги техник узилишлар сабаб. Бизда ҳайдовчиларнинг ойлик маоши соатбай ва қилинган ишга қараб ҳисобланади. Яъни, ой якунлангач, барча рейслар қабул қилингандан сўнг ҳисоб-китоб бошланади. Рейсларнинг қабул қилиниши эса баъзан турли сабаблар билан чўзилиши мумкин. Масъул ходимлар барча рейсларни ўрганиб, тасдиқлангандан сўнг рейслар асосида ҳайдовчиларга ойликни ҳисоблаймиз.

Олдинги ойда қўшимча маблағ бўлгани учун аванс берилган эди. Аммо ноябрь ойида молиявий аҳволимиз бироз оғирлашгани сабабли аванс бера олмадик ва ойлик 26 ноябрь куни тўлиқ берилди.

Маош кечикишига яна бир сабаб шуки, бизда ҳайдовчилар “Брутто” шартномаси асосида ишлашади. Бу тизимга кўра, маош ҳайдовчилар босиб ўтган масофа, интервалга риоя қилиши, хизмат сифати ва бошқа кўрсаткичлар асосида шаклланади. Бу жараёнлар табиий равишда вақт талаб қилади.

Бизда ҳайдовчилар бир кун ишлаб, бир кун дам олади. Ўртача 15 кунлик иш ҳақи 8-12 миллион сўмгача. Узоқ йиллик тажрибага эга ҳайдовчилар бундан ҳам кўпроқ маош олишади.

Келгусида ойлик масаласида чўзилишлар кузатилмайди. Ҳисоблашдаги янги тизимга мослашиш сабаб айрим кечикишлар бўлди. Ҳозирда жараёнлар такомиллаштирилмоқда.

Ойлик кечикаётгани ҳақида ҳайдовчилар огоҳлантирилмаган. Маош кечикса-да, тўлиқ берилди.