Қуйида тақдим этилаётган рўйхатни рейтинг деб бўлмайди, сабаби, ҳар бир клиника ўз йўналиши бўйича илғор. Аммо нисбий кўрсаткичлар айнан мана шу тиббий масканлар жаҳон етакчилари эканлигини исботлайди.

Бостон: Массачусетс бош госпитали

Узоқ 1811 йилда асос солинган бу тиббий марказ қатор йўналишларда илғор бўлсада, юрак касалликлари бўйича ютуқлари жиҳатдан яққол етакчи ҳисобланади. Жаҳоннинг энг малакали кардиохирурглари бу клиникада фаолият юритадилар, таълим оладилар ёки тажриба орттирадилар.

Ноёб тадқиқотлари билан машҳур бу клиника ходимлари орасида Нобель мукофотига лойиқ кўрилганлар сони 10 нафарни ташкил қилади.

Лондон: Great Ormond Street, энг яхши болалар шифохонаси

Тиббиётнинг жуда катта қисми бўлган педиатрия йўналишида Лондондаги 1852 йилда асос солинган бу шифохона олдига тушадигани йўқ. Дунёнинг жуда кўплаб давлатларида турли йўналишларда тадқиқотлар олиб борадиган бу клиника болалар дуч келадиган энг мураккаб касалликларни даволаш бўйича қатор патентларга эга. Хизматлари анча қиммат бўлсада, тиббий суғурталар болалар жонига оро киради.

Балтимор: Жон Ҳопкинс клиникаси

АҚШнинг Балтимор шаҳридаги бу кўп тармоқли клиникада жуда мураккаб операциялар амалга оширилган, тиббиётда муҳим роль ўйнаган тадқиқотлар қилинган, унинг талабалари ичидан Нобель мукофоти совриндорлари етишиб чиққан.

Бу касаллик бўйича энг ишончли ва фойдали тавсиялар, статистик маълумотлар ҳамда даволаш тактикаларини танлашда шу клиника фаолияти эталон вазифасини бажарди. Чуқур тадқиқотлари орасида ген инженерияси алоҳида ўрин тутади.

Йоханнесбург: Крис Хани Барагваната шифохонаси

Узоқ Жанубий Африка Республикасининг пойтахти Йоханнесбург шаҳридаги бу клиникада пандемияга қадар ҳам 5 минг нафар ходим ишлаган. Клиниканинг обрўси шу қадар баландки жуда кўп давлатлар беморлар келиб яхшигина пул тўлаб даволанишади.

70 гектар майдонда жойлашган бу тиббий масканда бирваракайига 3000 киши бемалол даволанади. Пандемия даврида ходимлар сони ҳам, беморлар сони ҳам ўртача 20-25 фоизга ошган.

Маълумот ўрнида: АҚШда электр энергиясининг энг катта истеъмолчилари тиббий клиникалар ҳисобланади.

Клифорния: Стэнфорд клиникаси

АҚШдаги бу клиниканинг ўзига хос жиҳати инновацион технологиялар қўллаши билан барчадан ўзиб кетган. Бу тиббий маскан телемедицина, микрожарроҳлик каби энг мураккаб йўналишларда илғор ҳисобланади. Шунингдек, тиббий ускуналарни ҳаётга татбиқ этиш бўйича энг кучли тадқиқотлар ҳам айнан шу клиникада ўтказилади.

Бу маскан ходимлари бир вақтда ҳам юрак, ҳам ўпкани кўчириб ўтказганлари, шунингдек, АҚШда биринчи бўлиб ёши катта одам юрагини кўчирганлари билан мақтана оладилар.

Берлин: Charitе клиникаси

Германия тиббиёти сингари клиникалари ҳам жаҳоннинг ҳар қандай тиббий масканлари билан беллаша оладилар. Биргина Charitе клиникасида бу давлатдаги тиббиёт ва физиология бўйича Нобель мукофоти соҳибларининг ярмидан кўпи ишлайди.

Мазкур клиника мураккаб жарроҳлик, хусусан онкология, трансплантология бўйича тадқиқотлар маскани ҳисобланади.

Техас: Андерсон онкология маркази

Бу клиника онкология йўналишидаги тадқиқотлар учун бир йилда ўртача 1 млрд долларгача инвестиция киритади.

Техас университети қошидаги бу тиббий марказ онкология соҳасидаги етакчи ҳисобланади. Сўнгги йиллардаги ўлим сабабчилари орасида тобора юқорилаб бораётган саратон касалликлари кўпайгани сари бу клиниканинг тадқиқотлари қамрови ҳам, беморлари сони ҳам ортиб бормоқда.

Аброр Зоҳидов