ДХХ ходимлари томонидан “Тошшаҳартрансхизмат” АЖнинг яна 3 нафар мансабдори қамоққа олингани маълум қилинди.
Қайд этилишича, транспорт соҳасида олиб борилган тезкор-қидирув тадбирлари натижасида корхона раҳбари А.Жўраевдан ташқари (бу ҳақда аввалроқ маълум қилинган эди, -таҳр.) бош муҳандис вазифасида ишлаб келган А.А. ҳамда 1 ва 8-автобус саройи филиаллари раҳбарлари Т.Д. ва И.Б.лар ўзаро тил бириктириб, автобус саройларидаги эҳтиёт қисмлар, ёқилғи маҳсулотларини талон-торож қилиш йўли билан давлат манфаатларига жуда кўп миқдорда иқтисодий зарар етказгани аниқланган.

Ҳозирда ҳолат юзасидан ДХХ Тергов бошқармаси томонидан “Тошшаҳартрансхизмат” АЖ мансабдор шахслари ва бошқаларга нисбатан Жиноят Кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, бош муҳандис ҳамда 1 ва 8-автобус саройи филиаллари раҳбарларига нисбатан “қамоққа олиш” тарзидаги эҳтиёт чораси қўлланилган.