Туркия биринчи АЭСини 2026 йил охиригача ишга туширмоқчи

Туркиянинг Мерсин вилоятида Россиянинг «Росатом» компанияси иштирокида қурилаётган «Аккую» АЭСининг биринчи энергоблокида синовлар бошланди. Туркия Энергетика вазирлигига кўра, у 2026 йил охиригача электр энергияси ишлаб чиқара бошлаши керак.

АЭС 4 та ВВЭР-1200 реакторидан иборат бўлиб, ҳар бир блокнинг қуввати 1200 МВт. Барча блоклар ишга тушса, станция йилига қарийб 35 млрд кВт/соат электр энергияси ишлаб чиқаради. Бу Туркия умумий истеъмолининг тахминан 10 фоизига тенг.
Қурилиш майдонида 23 мингга яқин киши ишламоқда. Электр энергияси миллий тармоққа узунлиги 1100 километрдан ортиқ бўлган 7 та юқори кучланишли линия орқали узатилади.

«Аккую» Россия атом энергетикаси учун ҳам алоҳида аҳамиятга эга. Лойиҳа «қуриш — эгалик қилиш — эксплуатация қилиш» тамойили асосида амалга оширилмоқда. Яъни Россия станция қурилишида иштирок этиш билан бирга, уни узоқ муддат эксплуатация қилишда ҳам иштирок этади.

Туркия «Аккую»ни атом энергетикасидаги якуний лойиҳа сифатида кўрмаяпти ва келгусида янги АЭСларни ҳам барпо этишни режалаштирмоқда.