Жадидлар ҳақида йирик роман нашрдан чиқди
Таниқли ёзувчи Наби Жалолиддиннинг икки китобдан иборат “Чўлпон” романи “Янги аср авлоди” нашриёти томонидан қайта нашрдан чиқди.
Жадидлар ҳаёти ва ижоди ҳақида ўзбек адабиётида ёзилган ушбу йирик бадиий асар Чўлпонга бағишланган бўлишига қарамай, унда барча жадидлар ҳақида сўз боради.
Романда жадидлардан ташқари озодлик йўлида жонини тиккан Мадаминбек қўрбоши каби фидойилар, мардикоролди сиёсатининг мудҳиш манзаралари, Қўқон мухториятидаги фитналар ва унинг қулаши, рус босқини каби воқеалар батафсил ёзилган.
Миллатнинг энг забардаст шоири, ёзувчиси ва жадиди Чўлпон ҳаётидаги эврилишлар, болалиги ва ижоди ҳақида батафсил ҳикоя қилинади. Чўлпонни сотганлар очиқ-ойдин кўрсатиб берилади. Чўлпоннинг қамалиши, қатл этилиши билан боғлиқ янги фактлар, ўзгача ёндашувлар романни янада бойитган. Энг муҳими, бари тарихий фактларга асосланган.
Дилогия 24 февралдан сотувга чиқарилди.
