Сhegirmalar barcha yo'nalishlar bo'yicha faqat bir kun, ya'ni 2025 yil 28 yanvar' kuni amal qilishi ham kompaniyaning rasmiy sahifalarida e'lon qilindi. Biroq, buni qarangki, va'da qilingan chegirmalar aslida haqiqatdan yiroq bo'lib chiqdi. Ya'ni narxlar 30 foizga arzonlashishi o'rniga aksincha qimmatladi.

Bugun kompaniyaning chegirma orqasidan kelib chiqqan aholining noroziliklarini barchamiz ijtimoiy tarmoqlar orqali kuzatmoqdamiz. Sayt ma'lumotlaridan ham narxlarni ko'rdik. Birgina aviakompaniyaning instagram tarmog'idagi rasmiy sahifasi ostidagi izohlar kishini o'ylantiradi. Hech bo'lmasa katta kompaniya uchun ijtimoiy monitoring tizimini joriy etish zarurligi va fuqarolar tomonidan bildirgan e'tirozlarni inobatga oladigan maxsus platforma yoki shikoyatlar bo'yicha tezkor javob beruvchi tizim yaratish kerakligi yaqqol ko'rindi.
Mashhur “chegirma” ortidan munosabat olish uchun O'zbekiston havo yo'llari axborot xizmatida faoliyat ko'rsatuvchi Jamoliddin ismli xodimga qo'ng'iroq qildim. Biroq, savollarimizga javob bergisi kelmay go'shakni qo'ydi va qayta qo'ng'iroqlarga javob bermadi.

Sir emaski, bugungi kunda xalqaro va mahalliy aviakompaniyalar o'rtasida raqobat oshib borayotgan bir sharoitda, O'zbekiston havo yo'llari tomonidan amalga oshirilayotgan chipta narxlarini belgilash va ularga chegirma qo'llash siyosati ijtimoiy tarmoqlarda va matbuotda jiddiy tanqidlarga sabab bo'lmoqda. Ko'plab fuqarolar va tahlilchilar kompaniya tomonidan taqdim etilayotgan chegirmalarning aslida sun'iy ekanligini va narxlar oldindan oshirilayotganini qayd etmoqda.

Сhegirma ortidagi haqiqat

Kuzatuvlar shuni ko'rsatmoqdaki, O'zbekiston havo yo'llarining chegirma aktsiyalari amalda mijozlarni jalb qilish uchun o'ylab topilgan bo'lib, ular chipta narxlarini sun'iy ravishda oshirish hisobiga amalga oshiriladi. Ya'ni, avvaliga chipta narxlari bozor talabidan yuqori miqdorda belgilab qo'yiladi, so'ngra unga “chegirma” qo'llanib, odatiy narx darajasida sotiladi.

Xalqaro standartlardan orqada qolish

Aviakompaniyaning bunday siyosati nafaqat iste'molchilarni chalg'itadi, balki kompaniyaning xalqaro bozordagi obro'siga ham salbiy ta'sir ko'rsatadi. Bugungi kunda raqobatchi aviakompaniyalar nafaqat arzon narxlar, balki xizmat sifatining yuqoriligi bilan ajralib turmoqda. Misol uchun, boshqa xorijiy aviakompaniyalarning huddi shu yo'nalish bo'yicha reyslari O'zbekiston havo yo'llariga nisbatan ancha arzon narxlarda va qulay shartlarda amalga oshirilmoqda.

Iste'molchilar noroziligi

O'zbekiston havo yo'llarining narx siyosati fuqarolar orasida keng norozilikka sabab bo'layotgani sir emas. Ko'plab iste'molchilar ijtimoiy tarmoqlarda o'z noroziliklarini bildirmoqda.
Misol uchun, mahalliy yo'nalishlar bo'yicha Toshkent–Urganch reysi uchun chipta narxi ba'zan 1 million so'mdan oshib ketmoqda.

Milliy aviakompaniyamiz vaziyatni ijobiy tomonga o'zgartirish uchun bir nechta yechimlar taklif qilishi lozim. Eng avvalo, narx belgilash siyosatini shaffoflashtirish. Bu borada kompaniya chiptalarning asl qiymati va chegirmalar siyosatini aniq ko'rsatib berishi kerak. Bu iste'molchilarning ishonchini yana qaytarishga yordam beradi. Qolaversa, chipta narxlari bozor talabiga mos ravishda belgilanishi lozim. Sun'iy narx ko'tarish kompaniyaning raqobatbardoshligiga putur yetkazadi.