Bozorda go'sht turlari ko'p — qo'y go'shti, mol go'shti, hatto import orqali kirib kelayotgan xorij go'shtlari ham bor.
Lekin oxirgi paytlarda odamlarni bir savol ko'p o'ylantirmoqda: eshak go'shtini qo'y go'shti deb sotishyaptimi? Yoki arzon go'shtlar haqiqatan ham xorijdan keltirilganmi?

Odamlarning shu kabi savollariga javob topish uchun Eski Juva dehqon bozorida kuzatuv o'tkazdik.
Bozorda faoliyat yurituvchi veterinariya-sanitariya ekspertiza laboratoriyasi vrachi Olimjon Mamadalievning aytishicha, eshak go'shtini iste'molchilar asosan rangi orqali aniqlashi mumkin.

“Eshak go'shtining rangi xiraroq, qoramtirroq bo'ladi. Mol va qo'y go'shti esa qizg'ish, barra bo'lib turadi. Lekin mazkur bozorda eshak go'shti sotilmaydi, bu bo'yicha muammoga sira duch kelmaganmiz. Bizda nazorat qat'iy,” — deydi vrach.

Mutaxassisning qo'shimcha qilishicha, aholi tomonidan echki go'shti sotilayotgani haqida bozor ma'muriyatiga shikoyatlar kelib turadi. “Echki gushti sotilyottganini aniqlaymiz. Shikoyatni tekshirib, oydinlik kiritib beramiz. Biroq echki go'shti foydali, odamlar buni tushunmaydi,” — dedi u.

Kuzatuvimizga ko'ra, bugun bozorlarga Belarus', Pokiston, Qozog'iston va Mongoliya davlatlaridan import go'shtlar kirib kelmoqda.

Import go'sht sotuvchining aytishicha:

“Aholi import go'shtlarga o'rganib bo'ldi. Yaxshi sotilyapti. Ayrim kafe va restoranlar ham asosan xorij go'shtlarini xarid qilmoqda. Pokistondan kelayotgan go'shtlarning narxi 65 mingdan 70 ming so'mgacha bo'lgan narxda sotilyapti,” — deydi u.