Xo‘sh, nima qilmoq lozim? Hammasi oddiy:

* Atrofga hushyor bo‘ling, tayyor turing. Kimdir lohas bo‘layotganini his qiling, darrov suyanchiq bo‘ling. Suv, soyaga olish, elpish bilan ham vaziyatni o‘nglashingiz mumkin;
* Keksalarni, bolalarni ehtiyot qiling. Keksalar yolg‘iz qolmasligi kerak. Bolalar esa cho‘milishga qochib ketishi mumkin. Xabardor bo‘lib turing;
* Issiqda vahima qilmang. Yuqori harorat oldin ham bo‘lgan, bo‘lyapti, yana bo‘ladi. Bu vaqtincha deya qabul qiling. Faqat eʼtibor bo‘ling;
* Qiyin sharoitda, pulsizlikda, zarurat tufayli ishlaydigan tanishlaringiz bo‘lsa, moddiy yordam bering. Masalan g‘isht zavod ishchilari, novvoylar, mardikorlar bir-ikki kun dam olishsin;
* Mashinangiz bo‘lsa, issiqda ko‘chada turganlarni olib keting, uzog‘ini yaqin qiling. Pul olmang, yana topilar;
* Tanishlaringiz orasida muhtojlar bor. Ko‘p. Svet-suv to‘loviga, eb-ichishga, ko‘chaga chiqishga qiynalib turgandir. Ulardan xabar oling. Muzdek ichimliklar ovolsangiz, nur ustiga nur;
* Kimgadir konditsioner hadya qilishga imkoningiz yo‘qdir. Lekin bitta ventilyator olib berish qiyin emas. Bir oila qanchalar quvonadi;
* Do‘koningiz bo‘lsa, «Ehson stoli» tashkil qiling. Misol uchun: 100 ta kichik suv, 250-300 ming so‘m xarajat bo‘ladi. 100 kishi hayratlanadi, sizni duo qiladi;
* Oshxonalar bir taqsimcha tarvuz, bir piyola muzdek kompotni bepul berib ham katta savob olishi mumkin. Ko‘pchilik buni yo‘lga qo‘ygan, ko‘proq targ‘ib qilishiz kerak;
* Taksichi aka-ukalar: mashinangizga birrov qarab qo‘ying, vositalar bilan tozalang. Hidlar o‘zingiz bilinmasligi mumkin, lekin chiqqan odamga ozor berib qo‘yishingiz hech gap emas;
* Jamoat joylarida o‘zingizni pokiza saqlashingiz bilan ham o‘rnak yoki aks holatga sababchi bo‘lishingiz mumkin. Badandagi «iforlar» atrofdagilar darrov seziladi;
* Korxona, tashkilotlar rahbarlari, tushlik paytida xodimlarning yarim soatgina dam olishi yoki mizg‘ib olishiga qarshilik qilmang;
* Ko‘cha-kuyda musor tashlamang. Buni faqat issiq kunlarda emas, doim yomon odatga o‘rganmang. Harorat yuqori bo‘lganda bitta banan po‘chog‘i bilan ham atrof-muhitni bemalol buzib berish mumkin. Unday qilmang;
* Eng muhimi – bu kunlar ham sinov. Har bir harakatingiz bilan faxrlanishingiz, har bir loqaydligingiz bilan noxush holatga sababchi bo‘lishingiz mumkin. Siz hammaga keraksiz!

Abror Zohidov