Hamshiralar zararli omillar bilan ishlaganligi uchun oylik maoshiga 15 foizli ustama xaqlar to'lanmayotganligiga e'tiroz bildirishgan. Ushbu murojaat atroflicha o'rganib chiqildi. Aslida, O'zbekiston Respublikasi Vazirlar Maxkamasining 2005 yil 21 dekabrdagi 276-sonli “Tibbiyot xodimlari mehnatiga haq to'lashning takomillashtirilgan tizimini tasdiqlash to'g'risida”gi qarorining tegishli bandlarida vizual nazorat qilgan holda operativ aralashuvlarda rentgen apparatlaridan foydalaniladigan barcha ixtisoslardagi xirurgiya bo'limlari kichik tibbiyot xodimlariga 15 foiz miqdorida qo'shimcha to'lov berish huquqi belgilab qo'yilgan. Lekin shunday bo'lsa-da, ish beruvchi tomonidan yuqoridagi xodimlarga zararli omil uchun qo'shimcha to'lov 2024 yil mart oyidan buyon to'lanmasdan kelingan.

Yuqoridagi to'lovlarni amalga oshirish yuzasidan O'zbekiston Sog'liqni saqlash xodimlari kasaba uyushmasining Toshkent viloyati Kengashi mehnat texnik inspektori tomonidan ish beruvchiga ko'rsatma xati kiritildi. Biroq, ko'rsatma xat ijrosi ta'minlanmadi. Shundan so'ng, fuqarolik ishlari bo'yicha Сhirchiq tumanlararo sudiga da'vo arizasi kiritildi.

Sudda xodimlarga zararli omil bilan ishlaganligi uchun to'lanmagan jami 20 mln. so'mdan ortiq mablag'ni undirish va xodimlarga oyma-oy to'lab borish bo'yicha xal qiluv qarori chiqarildi. Murojaatchi 10 nafar xodimlarning barchasiga ustamalar undirib berildi.

Jo'rabek Islombekov,
O'zbekiston Sog'liqni saqlash xodimlari kasaba uyushmasining Toshkent viloyati kengashi mehnat texnik inspektori